Matur | mbl | 30.5.2017 | 5:10

Chia-grautur sem tryllir bragðlaukana

Ljósmynd/Minimalist Baker

Chia-grautur hefur hingað til ekki verið flokkaður sem gourmet-matur en á því er að verða breyting. Þessi uppskrift er í senn meinholl og næringarrík auk þess sem hún býður upp á skemmtilegt tilbrigði við fræga ameríska uppskrift sem er kannski best að fjalla ekkert of mikið um hér enda gæti gætt vissra fordóma.

Um er að ræða chia-graut sem er frekar frábær auk hálfgerðs mauks (e. compote) sem búið er til úr bláberjum, appelsínusafa og chia-fræjum.

Virkilega skemmtileg útfærsla sem við erum sérlega hrifin af.

Chia-grautur sem tryllir bragðlaukana

Bláberjablanda

140 g bláber, fersk eða frosin
1 msk. appelsínusafi
1 msk. chia-fræ

Chia-grautur

240 ml ósætt möndlumjólk
120 ml létt-kókosmjólk
Valfrjálst: 1 tsk. vanilludropar
1-2 msk. hlynsíróp
3 msk. hnetusmjör, veljið holla tegund
60 g chia-fræ
Valfrjálst: Bláber til að skreyta með

Aðferð

Hitið bláber og appelsínusafann á lítilli pönnu eða í potti þar til blandan er farin að sjóða. Lækkið hitann og látið malla í tvær mínútur eða svo. Takið þá af hellunni og bætið chia-fræjunum saman við.
Deilið sósunni jafnt í þrjár skálar eða því sem þið ætlið að bera grautinn fram í. Setjið í kæli.
Setjið möndlu- og kókosmjólk í blandara ásamt vanilludropunum (valfrjálst), sírópi og hnetusmjöri. Blandið vel saman. Smakkið til.
Bætið chia-fræjunum saman við en ekki mauka vel því þið viljið ekki tæta fræin í sundur. Setjið í kæli í tíu mínútur eða svo. Takið því næst úr kæli og hrærið aðeins í. Hellið síðan í skálarnar sem búið var að setja bláberjablönduna í.
Setjið plastfilmu yfir og stingið í kæli í 1-2 tíma (helst yfir nótt).
Áður en þið berið grautinn fram er gráupplagt að skreyta hann með smá hnetusmjöri og bláberjum.
Geymist í kæli í 3-4 daga.