Matur | Matreiðsluþættir | mbl | 21.7.2017 | 5:00

Landsliðs-bernaise og stórkostlegt nautakjöt

Landsliðskokkurinn Kara Guðmundsdóttir mætir í þriðja þátt Grillað með Tobbu og kennir þar réttu handdtökin við meðferð og grillun nautakjöts. Hún ákvað að grilla rib-eye-steik og gera bernaise-sósu eftir kúnstarinnar reglum. Meðfylgjandi er jafnframt uppskrift að bernaise-krafti en það er nauðsynlegt að laga einn slíkan að minnsta kosti einu sinni á ævinni. Þrátt fyrir að ekki hafi viðrað vel undanfarið til utandyraeldmennsku má halda í vonina um að það breytist og þá er eins gott að vera tilbúinn.

Kara er sem áður segir liðsmaður í íslenska kokkalandsliðinu en slíkt þykir alla jafna mikil upphefð. Það voru því sönn forréttindi fyrir Matarvefinn að fá Köru í þáttinn og við mælum að sjálfsögðu með að þið klippið út þessa uppskrift og límið kirfilega inn í uppskriftabókina.

Bernaise-essense/kraftur

75 gr. hvítvínsedik
75 gr. rauðvínsedik
4 stk. piparkorn
1 stk. shallot-laukur
4 stk. piparkorn
½ chilli rauður

Aðferð

Svitið laukinn og chilli í potti
Bætið edikinu út í ásamt piparnum og sjóðið niður um 2/3
Kælið

Bernaise-sósa

6 stk. eggjarauður
250 gr. ósaltað smjör
1 msk. þurrkað fáfnisgras
½ tsk. salt
2 msk. bernaise-essense

Aðferð

Bræðið smjörið í potti yfir mjög lágum hita.
Þeytið eggin yfir vatnsbaði og passið að hitinn fari ekki yfir 80°C og að eggin eldist ekki í botninum.
Takið eggin af hitanum og hellið smjörinu rólega við og hrærið allan tímann. Passa þarf að skilja hvíta vökvann í botninum.
Bætið fáfnisgras út í og smakkið svo til með bernaise-essense og salti.

Sætar kartöflur

1stk. sæt kartafla
2 msk. repjuolía
1 tsk. salt
1 tsk. svartur pipar

Aðferð

Skerið sæt kartöfluna í 3 cm þykkar sneiðar
Pennslið með olíunni og raðið á bakka til að strá saltinu og piparnum jafnt yfir.
Setjið á volgari flötinn á grillinu svo að kartaflan brenni ekki.
Grillið í u.þ.b. 10 mín. á hvorri hlið (eldunartími fer eftir stærð og þykkt)

Nauta rib-eye

Takið kjötið úr kæli klukkutíma fyrir eldun.
Leggið kjötið á grillið í mjög heitum stað og EKKI hreyfa við því fyrr en þú snýrð því við!
Grillið í 3-5 mín. á hvorri hlið (eldunartími fer eftir þykkt bitans)
Takið kjötið af grillinu og vefjið því í álpappír þar sem það hvílir í 15 mínútur. Það að hvíla kjötið er jafnmikilvægt og að grilla það, þannig að biðin er klárlega þess virði.

Steikt brokkolí

1 stk. brokkolíhaus
75 gr. smjör
salt
½ grilluð sítróna
2 msk. repjuolía

Aðferð

Hitið pönnu og setjið olíuna á.
Raðið brokkolíinu þannig að hver biti snerti pönnuna.
Setjið klípu af salti á pönnuna.
Þegar brokkolíið er orðið gullinbrúnt skaltu snúa því við og bæta smjörinu við.
Passið að pannan sé heit svo að smjörið freyði. Færið bitana efst á pönnuna.
Bætið sítrónunni við og hallið pönnunni að ykkur þannig að smjörið sé neðst og brokkolíið og sítrónan efst. Notið skeið til að hella smjörinu yfir hráefnið í 20 sekúndur.
Takið af hitanum.