Matur | mbl | 15.3.2018 | 12:30 | Uppfært 13:10

Unaðslegur, já ég segi unaðslegur ítalskur fiskréttur!

Ítalskur þorskur er gúmmelaði sem sameinar holl hráefni en djúsí útkomu. Sleikið diskinn, lífið er stutt! mbl.is/TM

Í vikunni langaði mig í djúsí fiskrétt undir ítölskum áhrifum. Hollan mat en þó með smá ostatryllingi. Útkoman var vægast sagt ljúffeng. Diskar voru sleiktir og andvörp löng.

Þorskur í ítalskri sósu með basil og furuhnetum

Fyrir 4

800 g þorskhnakkar
2 gulrætur
½ laukur
1-2 hvítlauksrif
1 dós heilir cherry-tómatar
2 msk. ítalskt krydd
1 dl fersk basilíka
½ tsk salt (ég nota parmesan salt frá Nicolas Vahé)
1/3 tsk. pipar
60 g rifinn ostur
3 msk. rjómaostur
2 msk. furuhnetur
5 stk. sólþurrkaðir tómatar, saxaðir
ólífuolía

Aðferð:

Stillið ofninn á grill og 200 gráður.
Hitið 1 msk. af olíu í steypujárnspotti eða pönnu, best er að nota slíkan pott svo hann geti farið beint inn í ofn. Saxið laukinn, gulræturnar og hvítlauk og steikið upp úr olíu þar til hann fer að mýkjast. Hellið tómötunum út í pottinn ásamt 1 msk. af ítalska kryddinu og 1 dl af saxaðri ferskri basilíku.
Látið malla í 10 mínútur og slökkvið svo undir pottinum. Smellið svo þorskbitunum ofan á sósuna og saltið og piprið fiskinn. Setjið 1 msk. af ítölsku kryddi ofan á fiskinn.
Setjið rifinn ost, rjómaost og furuhnetur nokkuð jafn yfir fiskinn fagra. Að lokum koma saxaðir sólþurrkaðir tómatar yfir og herlegheitin eru höfð í ofninum í 12-15 mínútur eftir þykkt fisksins.