Matur | mbl | 20.7.2018 | 14:02

Forréttur fyrir lengra komna

Í Vestmannaeyjabæ rekur Einar Björn Árnason veitingastaðinn Einsa kalda. Einar man eftir sér sýslandi í eldhúsi sem lítill peyi og leiðin lá snemma í kokkanám á meginlandinu. Hann sneri svo til baka og þegar Landeyjahöfn varð að veruleika sá Einar að grundvöllur væri fyrir að opna flottan veitingastað í miðbænum og hafa hann opinn allan ársins hring. Ásdís Ásgeirsdóttir

Þessi uppskrift er gríðarlega spennandi en mögulega ekki á allra færi. Hér erum við með hrossa-tataki þar sem djúpsteiktir ætiþistlar, mangókrem og pikklaðar skrautrófur fara saman. Hljómar dásamlega og við segjum bara njótið vel!

Uppskriftin er úr smiðju Einsa kalda í Vestmannaeyjum.

Hrossa-tataki

Fyrir 6

300 gr. hrossalund

Skerið hrossalundina í 6 þunnar sneiðar, brúnið létt á pönnu á báðum hliðum.

Marínering fyrir kjötið

1 stk. laukur
3 hvítlauksgeirar
50 ml mirin (hrísgrjónaedik)
50 ml teríakísósa
4 msk. sesamolía
50 g brennt hvítlauksmauk (fæst í krukku í asíubúðum)
200 ml olía
pipar

Aðferð:

Setjið allt hráefnið, fyrir utan olíu, saman í matvinnsluvél og maukið. Hellið olíunni rólega í mjórri bunu saman við. Látið hrossakjötið marínerast í um 10 mínútur í leginum.

Djúpsteiktir ætiþistlar

2 stykki jerúsalem-ætiþistlar

Skerið ætiþistlana í mandólíni, setjið í ískalt vatn með smá salti. Þerrið og djúpsteikið. Saltið.

Mangókrem og meðlæti

1 poki frosið mangó

Setjið mangóið í blandara og maukið vel.

Skrautrófa

1 stk. skrautrófa

Skerið þunnt í mandólíni og pikklið.

Pikkl-lögur

1 hluti vatn 1 hluti sykur
1 hluti eplaedik

Takið fallegan disk og penslið hann með smá af maríneringunni. Raðið hrossakjötssneiðunum í hring ásamt pikklaðri skrautrófu og djúpteiktum ætiþistlum. Setjið mangósósuna inn á milli.

Njótið!