Matur | mbl | 19.9.2018 | 14:08

Brjálæðislegt brúsettu-kjúklinga-pasta

Kjúklingarétturinn sem þú munt gera aftur og aftur um ókomin ár.

Ef þú hefur ekki smakkað þennan áður þá getum við lofað þér því að þessi réttur mun verða reglulega á matseðlinum hér eftir. Brúsettu-kjúklinga-pasta með balsamik-ediki, basil og cherry-tómötum svo ekki sé meira sagt. Rétturinn er tilvalinn fyrir tvo, og þá áttu afganga daginn eftir, eða full máltíð fyrir fjóra.

Brjálæðislegt brúsettu-kjúklinga-pasta (fyrir 2-4)

500 g kjúklingabringur
¼ bolli ólífuolía
2 hvítlauksrif, söxuð
1 tsk. basiliku-krydd
½ tsk. salt
½ tsk. pipar
¼ oregano-krydd
¼ tsk. papríkukrydd

2 bollar cherry-tómatar
4 hvítlauksrif, söxuð
3 msk. fersk basilika, söxuð
2 msk. laukur, saxaður
2 tsk. ólífuolía
100 g mozzarella
Balsamik-edik
250 g penne-pasta
Fersk basilika til skrauts

Aðferð:

Takið kjúklingabringurnar og berjið þær örlítið flatar. Hrærið saman ólífuolíu, hvítlauk, basiliku, salti, pipar, oregano og paprikudufti og hellið yfir kjúklinginn í skál eða plastpoka og leyfið að marinerast í það minnsta 2 klukkutíma eða yfir nótt.
Hitið ofninn í 190°.
Setjið tómata, hvítlauk, basiliku, lauk og ólífuolíu í stóra skál og blandið vel saman. Saltið og piprið.
Hitið pönnu á meðalhita með smávegis af ólífuolíu. Brúnið kjúklinginn á báðum hliðum og leggið í eldfast mót ef pannan þolir ekki að koma í ofn. Stráið osti yfir bringurnar og einni skeið af brúsettu-blöndunni (restin fer með pastanu). Dreifið balsamik-ediki yfir bringurnar og inn í ofn í 15-20 mínútur eða þar til eldaðar í gegn.
Á meðan kjúklingurinn er í ofninum er pastað soðið samkvæmt leiðbeiningum. Blandið síðan brúsettu-blöndunni við pastað þegar það er tilbúið og jafnvel einni skeið af ólífuolíu. Skerið kjúklinginn í bita eða strimla og komið fyrir ofan á pastanu. Stráið ferskri basiliku yfir og blandið öllu vel saman.