Ný mathöll í lok febrúar

„Það er allt komið á fullt og þetta er farið að taka á sig fallega mynd,“ segir Steingerður Þorgilsdóttir, einn eigenda Mathallar Höfða sem opnuð verður í lok næsta mánaðar á Bíldshöfða 9.

„Við ætluðum að opna 15. febrúar en það verður ekki fyrr en í lok mánaðarins, það tekur allt lengri tíma en áætlað var,“ segir Steingerður. Hún er eigandi mexíkóska veitingastaðarins Culiacan á Suðurlandsbraut ásamt Sólveigu Guðmundsdóttur og sá staður verður einn sjö staða í mathöllinni.

Frétt af mbl.is

Ætla að opna Höfða mathöll í desember

Auk þess munu þær sjálfar reka Svanga Manga þar sem boðið verður upp á íslenskan heimilismat, en slíkt ætti að falla vel í kramið hjá vinnandi stéttum í nágrenninu.

Smurbrauð og morgundjúsar

„Svo verður brugghúsið Beljandi frá Breiðdalsvík hluti af bás Svanga Manga og tekur við þegar honum hefur verið lokað á kvöldin. Þau koma með kútana beint frá Breiðdalsvík, við erum ofboðslega spennt að fá þau,“ segir Steingerður.

Opnað verður í rýminu hægra megin við aðalinnganginn. mbl.is/Kristinn Magnússon

Auk þess verður hægt að gæða sér á hamborgurum frá Gastro Truck, asískum mat frá Wok On og indverskum mat frá Indian Grill sem er afsprengi Gandhi í miðborg Reykjavíkur. Þá er verið að ganga frá samningum við Íslensku flatbökuna. Að síðustu er það svo Hipstur þar sem skandinavísk stemning svífur yfir vötnum og boðið verður upp á smurbrauð, morgundjúsa og ýmsa hollustu- og grænmetisrétti. „Þarna verður matur frá öllum heimshornum,“ segir Steingerður.

„Það verður eitthvað í gangi allan daginn hjá okkur. Þú getur komið og fengið þér morgundjús eða kaffi þegar þú ferð á heilsugæsluna við hliðina á morgnana. Svo verður bakkelsi í kaffitímanum, þetta eru ekki eingöngu matartímarnir,“ segir Steingerður.

Hún segir að alltaf verði líflegt og góð stemning í Mathöll Höfða. „Við verðum með pílukast og ýmsar uppákomur um helgar. Það verður líf og fjör hérna.“