Matur | mbl | 5.2.2019 | 16:07 | Uppfært 6.2.2019 6:18

Bestu snúðar sem þú munt smakka

Ómótstæðilegir snúðar! mbl.is/TheFoodClub

Nýbakaðir brauðsnúðar með nóg af smjöri og kanil voru að koma úr ofninum. Það verður að segjast að við sýnum veikleikamerki þegar slíkar kræsingar lenda á borðinu og ekki lengi að grípa einn til að smakka. Hér er uppskrift að fléttuðum súrdeigssnúðum – en ef þú átt ekki súrdeig er ekkert mál að sleppa því, bara ekki sleppa því að baka.

Fléttaðir súrdeigssnúðar (ca. 12 stk.)

Deig:

20 g ger
3 msk. súrdeig
3 dl mjólk
1 egg
75 g sykur
Salt á hnífsoddi
10 g kardimommur
650-700 g hveiti
100 g smjör

Kremfylling:

125 g mjúkt smjör
3-4 tsk. kanill
125 g sykur

Aðferð:

Setjið ger í hrærivélaskál ásamt súrdeigi og mjólk og hrærið gerið út. Bætið við eggi, sykri, salti og kardimommu og hrærið aftur í.
Bætið hveiti í smátt og smátt og passið að deigið verði ekki of þurrt. Hnoðið í um 5 mínútur og setjið þá litla smjörbita út í. Hrærið áfram í 3-4 mínútur. Deigið á að vera laust frá skálinni og vera létt í sér. Látið hefast á heitum stað í 1-2 tíma.
Hrærið á meðan í kremfyllinguna – smjör, kanil og sykur saman.
Þegar deigið hefur tekið sig, sáldrið þá hveiti á borðið og rúllið deiginu út í ferning 30x45 cm.
Smyrjið kreminu jafnt á deigið. Brjótið einn þriðja af deiginu inn að miðju og hina hliðina inn á fyrsta hlutann – þannig að deigið verði í þreföldu lagi. Rúllið þá deiginu lauslega út aftur. Skerið í 12 strimla (30 cm langar og 2,5 cm breiðar). Snúið upp á strimlana og gerið nettan hnút.
Leggið á bökunarplötu með bökunarpappír og penslið með pískuðu eggi.
Bakið við 200° í 12 mínútur.