Matur | mbl | 11.7.2019 | 14:27

Kaffi-marengs með ís í boði Nicolas Vahé

Þessi bomba er ómissandi með kaffinu. mbl.is/Nicolas Vahé - Ísland

Sælkeravörurnar frá Nicolas Vahé eru hreint út sagt ómótstæðilegar. Oftar en ekki birtast uppskriftir á samfélagsmiðlunum sem erfitt er að líta framhjá. En þessi bomba er með þeim girnilegri sem við höfum séð. Það er komin kaffi marengs ís-terta á borðið – verði ykkur að góðu.

Kaffi-marengs með ís í boði Nicolas Vahé

7 eggjahvítur
250 gr sykur
½ tsk. lyftiduft
1 tsk. Nicholas Vahé kaffi (mjög sterkt)
2 ísdollur Haagen Dazs vanilla
14 tsk möndlur saxaðar
2½ tsk Nicolas Vahé malað kaffi
Nicolas Vahé sjávarsalt
1 plata Síríus 70% súkkulaði, saxað

Aðferð:

Hitið ofn í 200°C.
Stífþeytið eggjahvítur, sykur og bætið síðan lyftidufti út í.
Klæðið tvær bökunarplötur með bökunarpappír og mótið 2 hringi með marengsinum.
Dreifið ½ tsk af sterku kaffi yfir sitthvorn marengsinn og setjið inn í ofn og lækkið niður í 115°C og bakið í 60 mínútur.
Setjið ís í hrærivél og bætið súkkulaðinu út í, möndlum og kaffi. Hrærið saman í um hálfa mínútu. Smyrjið ískreminu ofan á annan marengsbotninn og dreifið smáveigis af sjávarsalti yfir. Leggið seinni botninn ofan á og berið fram með rjúkandi heitum kaffibolla.