Matur | mbl | 17.9.2019 | 10:49 | Uppfært 11:23

Geggjaður kjúklingaréttur sem slær í gegn

Alveg geggjaður tai-kjúlli með stökkum kasjúhnetum. mbl.is/Colourbox

Þegar veðrið er ekki upp á marga fiska er gott að ylja sér yfir kjúklingarétti sem gleður bragðlaukana. Hér er tai-kjúlli í sinni bestu útgáfu með stökkum kasjúhnetum. Gjörið svo vel!

Besti tai-kjúllinn með kasjúhnetum

2 litlir laukar
2 vorlaukar
400 g kjúklingabringur frá Ali
3 msk. sólblómaolía
80 g kasjúhnetur
3 stór hvítlauksrif
2 msk. þurrkaðar chiliflögur
hrísgrjón (ef vill)

Sósa:

2 tsk. sojasósa
2 msk. teriyaki sósa
2 msk. fiskisósa
2 msk. púðursykur
2 msk. vatn

Aðferð:

Skerið laukana gróflega.
Skerið kjúklinginn í þunnar langar skífur. Ristið kasjúhneturnar upp úr olíu á pönnu, annaðhvort wok-pönnu eða stórri pönnu. Takið hneturnar upp með töng og leggið þær á pappír og leyfið olíunni að leka af. Leyfið olíunni að liggja áfram á pönnunni.
Steikið laukana upp úr olíunni og pressið hvítlaukinn út á pönnuna ásamt chiliflögunum – veltið saman í sirka 2 mínútur þar til það byrjar að ilma af chili.
Bætið kjúklingnum út á pönnuna og steikið áfram í 4-5 mínútur þar til kjötið er gegnumsteikt. Bætið þá kasjúhnetunum saman við ásamt sósunni. Því næst kemur vorlaukurinn og pannan er tekin af hitanum.
Sósa: Hrærið öllum hráefnunum saman í skál og látið standa í smá stund.
Berið réttinn fram með steiktum hrísgrjónum eða núðlum.