Ilmandi kanilsnúðabomba (12 stk.)

• 50 g ger
• 100 g smjör
• 2,5 dl mjólk
• 2 egg
• 4 msk. sykur
• salt á hnífsoddi
• 1 msk. kardimomma
• 400 g hveiti
• 1 dl mjólk til að pensla

Krem:

• 120 g smjör
• 3 msk. sykur
• 1 msk. kanill

Glassúr:

• 200 g flórsykur
• 1 msk. smjör
• 1 msk. vatn

Aðferð:

1. Setjið gerið í stóra skál. Bræðið smjör í potti við lágan hita. Hitið mjólkina í öðrum potti þar til volg og hellið henni út í gerið ásamt smjörinu.
2. Pískið eggin út í, eitt í einu. Bætið sykri, salti og kardimommu út í og hveitið fer saman við smátt og smátt. Hnoðið þar til slétt og fínt. Látið hefast á volgum stað í 1 tíma.
3. Hitið ofninn á 200°C.
4. Setjið deigið á hveitilagt borð og hnoðið létt saman. Skiptið deiginu upp í 2 jafn stóra hluta og rúllið út hvorum hluta fyrir sig í ferhyrning að stærðinni 20x25 cm.

Krem:

1. Hrærið hráefnin saman og smyrjið jafnt ofan á hvern deighluta. Rúllið deiginu upp eins og rúllutertu. Skerið í bita með beittum hníf, sirka 4 cm þykka.
2. Klæðið bökunarplötu með bökunarpappír og setjið snúðana hlið við hlið á plötuna, með smá bili á milli – þeir mega klessast og festast saman er þeir bakast. Penslið með mjólk og bakið í ofni í 10-12 mínútur, þar til þeir verða gylltir á lit.

Glassúr:

1. Hrærið flórsykur, smjör og vatn saman og smyrjið á snúðana þegar þeir hafa kólnað.