Matur | mbl | 28.12.2019 | 17:11

Smurbrauð með rauðsprettu og heimagerðu remúlaði

Smurbrauð af bestu gerð og hér með rauðsprettu og heimagerðu remúlaði. mbl.is/Hildur Rut Ingimarsdóttir

Eitt allra besta „smørrebrød“ er mætt á borðið og hér með rauðsprettu, rauðkáli og heimagerðu remúlaði sem er mun betra en búðarkeypt.

Smurbrauð er orðin árleg hefð í kringum jólin hjá Hildi Rut og fjölskyldu, en hún var alin upp við að borða slíkar kræsingar á aðventunni. Hér bakar hún rauðsprettuna í ofni en hún segir það vera bæði betra og fljótlegra – og svo undirbýr hún meðlætið á meðan fiskurinn bakast.

Smurbrauð með rauðsprettu og heimagerðu remúlaði (fyrir 4)

800 g rauðspretta (má kaupa með roðinu á)
1 dl hveiti
2 egg
3-4 dl panko rasp
Salt og pipar
20-40 g smjör
Rúgbrauð, (Hildur Rut kaupir heilkorna rúgbrauð)
Ferskt rauðkál, eftir smekk
Steinselja

Heimagert remúlaði

3-4 sýrðar gúrkur
1 msk. capers
4 msk. majónes
2 msk. sýrður rjómi
3 msk. dijon sinnep
Karrý
Túrmerik
Salt og pipar

Aðferð:

Roðflettið rauðsprettuna ef það þarf og skerið í bita sem passa á rúgbrauð.
Pískið egg í skál. Hellið hveiti á disk og hrærið saman brauðraspi og kryddi í djúpum diski eða skál.
Veltið fiskinum upp úr hveitinu, egginu og síðan raspinum.
Skerið smjör í litla teninga og raðið í botninn á eldföstu formi.
Dreifið fiskinum ofan á smjörið og dreifið meira smjöri ofan á fiskinn. Bakið í 30 mínútur við 200°C.
Skerið rauðkálið í þunnar ræmur.
Smyrjið rúgbrauðið með smjöri, dreifið rauðkálinu ofan á, því næst kemur rauðsprettan og toppið svo með remúlaði og ferskri steinselju.

Heimagert remúlaði

Skerið sýrðu gúrkurnar smátt.
Hrærið saman majónesi, sýrðum rjóma, sinnepi og kryddi. Varist að krydda of mikið með karrý eða túrmeriki, mæli með að smakka sig áfram.
Bætið svo við sýðrum gúrkum og capers og hrærið.