Matur | mbl | 13.2.2020 | 17:16

Svívirðileg samloka sem er löðrandi í lúxús

Humarloka eins og hún gerist best með bræddum osti og hvítlaukssmjöri. mbl.is/Howsweeteats.com

Þá má sannarlega kalla samloku sem þessa „lúxusmat” – enda er kílóverðið á humri ekki það lægsta ef við förum rétt með mál. En það er ekki þar með sagt að við megum ekki leyfa okkur smá lúxus, þvert á móti. Við elskum humar og hér er hann í samlokuformi sem við fáum ekki nóg af.

Fáránlega góð humarloka

Humarhalar
1 msk. ólífuolía
1 msk. ósaltað smjör
1 hvítlauksrif
Salt og pipar
Majónes
Havarti ostur
4 sneiðar af uppáhalds brauðinu þínu

Hvítlaukssmjör

6 msk. ósaltað mjúkt smjör
2 msk. tarragon, smátt saxað
1 hvítlauksrif

Aðferð:

Takið humarinn úr skelinni, hreinsið og þurrkið vel. Hitið stóra pönnu á meðal hita og setjið 1 msk af ólífuolíu og 1 msk af smjöri. Saltið og piprið humarinn og steikið hann í 5-6 mínútur og leggið síðan til hliðar á disk.
Hvítlaukssmjör: Blandið öllum hráefnum saman í skál.
Smyrjið allar brauðsneiðarnar með góðu majónesi og smyrjið hina hliðina á brauðsneiðunum með hvítlaukssmjörinu. Leggið humar og havarti ostsneiðar ofan á hliðarnar með majónesinu og smellið tveim og tveim brauðneiðum saman, þannig að útkoman verði tvær samlokur.
Grillið á pönnunni þar til brauðið verður gyllt á lit og osturinn byrjar að bráðna, sirka 4-5 mínútur á hvorri hlið.
Berið strax fram.

Uppskrift: How Sweet Eats