Matur | mbl | 15.2.2020 | 10:35 | Uppfært 13:36

Samvisku-bitar sem þú færð ekki nóg af

Ljósmynd/Colourbox

Heimagerðar múslístangir er saklaust millimál sem þú færð ekki samviskubit yfir að borða aðeins of mikið af. Sætan í þessum brjálæðislega góðu bitum kemur frá döðlum og hunangi. Hér getur þú skipt möndlunum út með t.d. hesli- eða valhnetum og þú ræður algjörlega hvort þú dýfir endanum í súkkulaði eða ekki.

Samvisku-bitar sem þú færð ekki nóg af (sirka 15 stk)

150 g haframjöl
150 g möndlur
75 g sesamfræ
50 g hörfræ
50 g kókosmjöl
150 g döðlur
150 g fljótandi hunang
45 g smjör
½ tsk. salt
125 g rúsínur eða trönuber
150 g dökkt súkkulaði

Aðferð:

Hitið ofninn á 200°C á blæstri.
Setjið bökunarpappír á bökunarplötu og hellið haframjöli, möndlum, sesamfræjum, hörfræjum og kókosmjöli á plötuna. Ristið í ofni þar til hefur tekið lit í sirka 15 mínútur. Setjið þá hráefnin í skál.
Maukið döðlurnar mjúkar og blandið þeim saman við hunang, smjör og salt í litlum potti. Bræðið saman á meðalhita. Hellið blöndunni saman við ristaða hráefnið og blandið vel saman. Bætið rúsínunum saman við.
Hellið múslí-massanum í form (21x21 cm) klætt bökunarpappír. Bakið í 15 mínútur.
Látið alveg kólna áður en þú skerð niður í passlegar stærðir, annars fellur blandan bara í sundur ef hún er ekki orðin alveg köld.
Bræðið súkkulaði og dýfið stykkjunum þar ofan í – nóg að gera til helminga eða rétt á endann. Setjið í kæli á meðan súkkulaðið harðnar.
Múslístangirnar endast í allt að tvær vikur í kæli, í lofttæmdu íláti.

Uppskrift: Frederikke Wærens