Rauðsprettan góða

Fyrir 2

• 2 lítil rauðsprettuflök
• 2 brauðsneiðar gróft brauð
• hveiti, í skál
• þeytt egg
• panko-rasp, í skál
• smá rjómi
• olía og smjör
• rækjur, til að setja ofan á
• dill, til skreytingar

Hreinsið rauðsprettuflökin og veltið upp úr hveiti, þeyttu eggi með smá rjóma út í og því næst sett í panko-rasp. (Panko-raspur er japanskur brauðraspur sem fæst í flestum stórmörkuðum). Því næst eru flökin djúpsteikt í olíu eða steikt á pönnu í olíu og smjöri.

Heimatilbúið remúlaði

• 6-8 gulrætur flysjaðar
• 1 blómkálshaus lítill
• 1 krukka cornichon (litlar súrar gúrkur)
• 1 krukka capers
• túrmerik
• dijon-sinnep

Sultulögur

• 4 dl edik
• 2 dl vatn
• 200 g sykur
• blandað krydd, t.d. piparkorn, sinnepsfræ, lárviðarlauf o.s.frv.

Blómkál og gulrætur er sýrt í sultulegi og svo hakkað smátt ásamt gúrkum og capers.

Þessu er svo blandað saman við majónes ásamt túrmeriki fyrir gula litinn og smá dijon.

Kastrup-rækjubrauð

Fyrir 2

• 2 brauðsneiðar
• 100 g rækjur
• soðin egg
• heimagert majónes

Nota skal gott gróft brauð, eða rúgbrauð, og eðalrækjur. Hægt er að skreyta að vild með ferskum kryddjurtum.

Á Kastrup er majónesið búið til frá grunni.

Heimalagað majónes

• 1 dl eggjarauður
• 25 ml lager edik eða annað gott edik
• 1 tsk. ca. Dijon-sinnep
• 1 l hlutlaus olía, t.d. repjuolía,
• salt

Blandið öllu saman í matvinnsluvél eða hrærivél, nema olíunni. Þeytið mjög vel. Hellið svo olíunni í þunnri bunu út í á meðan hrært er og úr verður majónes. Gott er að bragðbæta það eftir á með ediki, salti og sinnepi ef þarf. Þetta er nokkuð stór uppskrift og geymist vel í kæli, en má gjarnan helminga.

Roast beef

Fyrir 2

• 2 grófar brauðsneiðar
• 100 g roast beef
• heimalagað remúlaði (sjá uppskrift hér á síðu)
• steiktur laukur
• súrar gúrkur

Steiktur laukur

• 1 laukur, skorinn í þunnar sneiðar
• smá mjólk
• hveiti í skál
• olía til djúpsteikingar

Sneiðið laukinn í þunnar sneiðar og setjið í mjólk. Veltið svo upp úr hveiti og djúpsteikið rétt áður en brauðið er borið fram.

Fyrir sultaðar agúrkur er hægt að notast við sultulöginn sem gefinn var upp hér á síðunni. Sneidd agúrka er þá sett í kaldan löginn og geymd þar í að minnsta kosti viku áður en notaðar.