Matur | mbl | 17.4.2020 | 17:23 | Uppfært 17:53

Auðveldasti heimabakstur í heimi

Frábærar bollur sem þú undirbýrð kvöldinu áður og býður fjölskyldunni upp á nýbakað morguninn eftir. mbl.is/Colourbox

Við elskum góðar bolluuppskriftir – en við elskum enn meira að borða afraksturinn. Hér er uppskrift að bollum sem þú getur undirbúið kvöldið áður og boðið fjölskyldunni upp á nýbakað morguninn eftir.

Auðveldar hafrabollur (12 stk)

5 g ger
3½ dl kalt vatn
125 g haframjöl
1 msk. hunang
125 g rúghveiti
125 g hveiti
1 tsk. gróft salt
½ msk. kaldpressuð rapsolía (til að smyrja formið)

Annað

Haframjöl til skreytingar – eins má nota hörfræ, sesamfræ, sólblómakjarna, saxaða graskerskjarna eða hnetur.

Aðferð:

Hrærið gerið út í kalt vatnið og bætið haframjöli saman við ásamt hunangi, rúghveiti og hveiti.
Hnoðið í 5 mínútur.
Bætið salti saman við og haldið áfram að hnoða í nokkrar mínútur til viðbótar.
Setjið plastfilmu yfir deigið og inn í ísskáp í 12-24 tíma.
Smyrjið muffinsform með olíunni (álform með pláss fyrir 12).
Dýfið höndunum eða skeið í kalt vatn og leggið einn klump af deigi ofan í hverja „holu“ í forminu.
Stráið haframjöli eða öðru ofan á deigið og látið bollurnar hefast í sirka 1 tíma.
Bakið við 225°C í 20-25 mínútur. Látið kólna á rist.