Matur | mbl | 13.6.2020 | 5:25

Morgunbollur meistarans

Það jafnast ekkert á við nýbakaðar morgunbollur um helgar. mbl.is/Colourbox

Hér eru einstakar morgunbollur á ferð – því þær eru á mörkunum að vera muffins eða bollur. Í þessari uppskrift eru bollurnar fullar af grófum hnetum, súkkulaði og döðlum sem veita bragðlaukunum mikla ánægju.

Morgunbollur meistarans (12-16 stk)

25 g ger
4 dl volgt vatn
4 msk. hunang
1 tsk. salt
¼ dl ólífuolía
300 g gróft spelthveiti
75 g hveiti

Annað

100 g dökkt súkkulaði, saxað
100 g valhnetur, saxaðar
50 g heslihnetuflögur
50 g rúsínur
50 g döðlur, saxaðar

Aðferð:

Leysið gerið upp í vatni og bætið hunangi, salti og olíu saman við.
Hrærið báðum hveitunum út í – og hér skal deigið vera eins og hafragrautur. Setjið því næst súkkulaðið, valhnetur, heslihnetuflögur, rúsínur og döðlur saman við. Látið hefast við stofuhita í 45 mínútur eða yfir nótt í ísskáp (og þá jafna sig í 20 mínútur við stofuhita ef deigið fer inn í ísskáp).
Fyllið muffinsformin upp að helming og látið hefast í 20 mínútur í forminu. Bakið við 185°C í 15-20 mínútur.
Berið fram volgar eða við stofuhita.