Matur | mbl | 5.8.2020 | 18:10

Ostaídýfan sem gerir allt vitlaust

Ostaídýfa sem þú getur ekki lagt frá þér! mbl.is/Hildur Rut Ingimarsdóttir

Hér um ræðir ostaídýfu sem sögur fara af! Þessi þykir með þeim betri sem sést hafa í lengri tíma og það ekki að ástæðulausu – því ídýfan inniheldur þrjár tegundir af ostum ásamt jalapeno sem gerir allt örlítið betra. Uppskriftin er í boði Hildar Rutar sem segir ídýfuna vera fullkomna á grillið.

Ostaídýfan sem gerir allt vitlaust

200 g Philadelphia rjómaostur með graslauk
1½ dl sýrður rjómi
3 dl rifinn cheddar ostur
½ dl rifinn parmigiano reggiano
1 dl smátt skorinn jalapeno (eða minna ef þið viljið ekki sterkt)

Toppa með

35 g smör
½ dl rifinn parmigiano reggiano
⅔ dl panko raspur
Steinselja smátt skorin
Tortillaflögur með ostabragði frá Maarud

Aðferð:

Blandið saman rjómaosti, sýrðum rjóma, cheddar osti, parmigiano og jalapeno. Dreifið blöndunni í eldfast mót eða steypu járnspönnu.
Bræðið smjör í potti, bætið parmigiano og raspi saman við og hrærið vel saman.
Dreifið raspinum yfir ídýfuna og bakið í ofni við 190°C á blæstri í 20 mínútur eða þar til ídýfan er orðin gyllt og stökk. Það er einnig mjög gott að grilla ídýfuna.
Dreifið steinseljunni yfir í lokin og berið fram með tortillaflögum.