Matur | mbl | 23.5.2021 | 10:56 | Uppfært 24.5.2021 11:59

Guðlaugur Þór bauð upp á dýrindiskjötbollur

Ágústa, Guðlaugur og Albert.

Albert Eiríksson er formlega vinsælasti matargestur landsins og nú var hann í mat hjá Guðlaugi Þór Þórðarsyni og Ágústu Johnson sem fá hæstu einkunn hjá Alberti fyrir skemmtilegheit og matreiðsluhæfileika.

„Gulli (hann er svo alþýðlegur og léttur, að það er eiginlega of hátíðlegt að segja Guðlaugur Þór Þórðarson utanríkisráðherra, en það er hann auðvitað og hér með er þeim formlegheitum lokið) er einn af öflugustu stjórnmálamönnum landsins, en færri vita að hann er hörkukokkur. Raunar er matargerð sameiginlegt áhugamál þeirra hjóna, en Ágústa í Hreyfingu er eðlilega mikil áhugakona um gott hráefni og staðgóðan, hollan mat,“ segir Albert á blogginu sínu Albert eldar og bætir við að meðfylgjandi uppskrift sé mikil leyniuppskrift sem hann hafi haft áhuga á að smakka.

„Gulli er afbragðsgrillari, en mig langaði til að biðja hann að gefa leyniuppskriftina sína að kjötbollum, sem eru framúrskarandi ljúffengar og auðvitað heimilislegar í senn. Hann tók því ljúfmannlega og það verður að segjast eins og er, að hann ber sig fagmannlega að í eldhúsinu.

Kjötbollurnar eru að sjálfsögðu gerðar frá grunni úr úrvalshráefni. Hann notar hreindýrahakk, en leynitrikkið er hins vegar Dijon-sinnep. Gott hráefni, einföld og pottþétt uppskrift, vel þess virði að prófa!“

Hreindýrakjötbollur

600 g hreindýrahakk
2 brauðsneiðar
1,5 dl mjólk
1 msk. Worchester-sósa
1 msk. „villijurtir“ frá Pottagöldrum
ca. 10 einiber
2 tsk. sjávarsalt
1 tsk. nýmulinn pipar
Setjið brauðið í skál ásamt mjólkinni og bleytið það vel. Myljið einiberin vel í morteli. Setjið kryddin í skál og blandið saman. Bætið kjötinu við og Worchester-sósunni og hrærið vel saman. Takið brauðið upp úr mjólkinni, maukið það í litla bita og blandið saman við kjötið. Mótið kjötbollur úr blöndunni.

Það er gott að geyma bollurnar í kæli í um klukkustund áður en þær eru eldaðar eða nota hakkið á meðan það er kalt.

Hitið olíu og smjör saman á pönnu og brúnið bollurnar í 3-4 mínútur á hvorri hlið. Setjið í eldfast mót og inn í 180°C heitan ofn á meðan að þið gerið sósuna á sömu pönnu og bollurnar voru steiktar á.

Rjómasósa

2 dl hvítvín
2,5 dl rjómi
1 msk. sojasósa
2 msk. kálfafond eða kjúklingafond
1 msk. Worchester-sósa
2 msk. sulta, t.d. rifsberja
1 msk. Dijon-sinnep eða honey dijon

Hitið pönnuna og hellið hvítvíninu út á ásamt kálfakraftinum, sojasósu og Worchester. Leysið skófirnar á pönnunni upp með sleif og látið vínið malla í smá stund eða þar til það hefur soðið niður um tæpan helming. Bætið rjómanum út á og látið malla áfram á vægum hita þar til sósan fer að þykkna. Bætið sultunni saman við. Alveg undir lokin er sinnepið pískað saman við.