Það allra sniðugsasta sem við höfum séð í kosningabaráttunni hingað til er Kjóstu rétt með Heimkaup þar sem forsvarsmenn stjórnmálaflokkanna deila uppskrift sem endurspeglar að einhverju leiti gildi flokksins og helstu stefnumál.

Bjarni Ben ákvað að skella í eina góða klassíska köku eins og honum einum er lagið en hann er þekkur fyrir afburðar takta í kökubakstri og skreytingum. Uppskriftina segir hann komna frá Evu Laufeyju en Bjarni er maður stöðugleikans og stöðugleikinn í kökunum er eðli málsins samkvæmt súkkulaðikakan. Segir sig allt sjálft.

Stöðugleikakaka Bjarna Ben

Botninn

• 3 bollar hveiti
• 2 bollar sykur
• 4 egg
• 2 bollar AB mjólk
• 1 bolli bragðlítil olía
• 6 msk kakó
• 2 tsk. lyftiduft
• 1 tsk. matarsódi
• 2 tsk. vanilludropar

Smjörkremið

• 500 g smjör
• 500 g flórsykur
• 150 g suðusúkkulaði
• 3 msk kakó
• 1 msk uppáhellt kaffi (má sleppa)
• 2 tsk vanilludropar
• 1 eggjarauða

Aðferð

Botninn

1. Setjið þurrefnin í skál og blandið saman með trésleif
2. Bætið AB mjólkinni, olíunni og vanilludropunum saman við og hrærið mjúklega saman
3. Gott er að láta þetta aðeins í hrærivél ef slík græja er til

Smjörkremið 

1. Hafið smjörið við stofuhita.
2. Blandið saman smjöri, flórsykri og kakói, það er ágætt að gera þetta í höndunum, bara passa að smjörið sé mjúkt þegar byrjað er. 
3. Bræðið súkkulaðið í örbylgjuofni og pískið eggjarauðuna aðeins svo þær verði léttar og loftkenndar.
4. Blandið eggjarauðunni og suðusúkkulaðinu varlega saman við þurrefnin.
5. Að lokum fer kaffið í skálina ásamt vanilludropum.

Skreyting

Hér er komið að því að virkja hugmyndir og sköpunargleði. Hið besta í samfélaginu verður ekki sett í uppskrift - heldur fær einstaklingsframtakið að njóta sín.

Uppskrift: Bjarni Ben