Malt og appelsín er ekki bara malt og appelsín

Malt og appelsín er algjörlega ómissandi á flestum íslenskum heimilum fyrir jólin. Fjölskyldur eru þó margar með afar mismunandi blöndunaraðferðir og ólíkar uppskriftir af drykknum góða. 

Rætt var um jóladrykkinn í morgunþættinum Ísland vaknar á K100 á dögunum og deildu hlustendur sínum aðferðum við að blanda drykkinn með þeim Kristínu Sif, Jóni Axel og Ásgeiri Páli.

Romm í malt og appelsín

Einn hlustandi sem hringdi inn í þáttinn deildi því að hans fjölskylda blandaði saman akkúrat jafn miklu magni af malti og appelsíni en bætti svo smá rommi út í drykkinn.

Kókdropi ómissandi í drykkinn

Annar sem hringdi inn sagði það vera ómissandi að setja örlítinn kókdropa með. „60% af malti, 35% af appelsíni og 5% af kóki.“ 

Grét þegar hvítölið var ekki fáanlegt

Hlustandi nokkur sem hringdi inn sagðist hafa grátið í nokkra daga þegar í ljós kom að hvítöl Egils verður ekki á boðstólnum í ár en hún segir algjörlega nauðsynlegt að blanda hvítöli með maltinu og appelsíninu. Hlustandinn gat þó huggað sig við það að von er á hvítölinu góða aftur á næsta ári en hún notar á meðan danskt hvítöl.

Frétt af mbl.is

Ekkert Jólaöl með appelsíni eða Hvítöl í ár

„Þetta sýnir hvað við erum rosalega föst í hefðum og maður verður bara svekktur og sár, “ sagði hlustandinn en margir áttu góðar minningar af hvítölinu sem rifjaðar voru upp í þættinum en hægt er að hlusta á hann í spilaranum hér að ofan.

• Blogga um frétt