Matur | mbl | 24.3.2023 | 11:01

Trufflu-risottóið sem Eva Laufey elskar

Það er engin önnur en eldhúsgyðjan Eva Laufey Kjaran, markaðs- og upplifunarstjóri Hagkaups sem galdrar hér fram eitt það allra geggjaðasta risotto sem sögur fara af. Tilefnið eru Sælkeradagar Hagkaups sem standa yfir en þar kennir ýmissa gúrmei-grasa fyrir matgæðinga.

Frétt af mbl.is

Uppskeruhátíð sælkeranna hefst í dag

Evu Laufeyju þarf ekki að kynna enda hafa matreiðslubækur hennar selst í bílförmum og þjóðin hámhorft á matreiðsluþætti hennar um árabil.

Trufflu-risotto með sveppum

Fyrir 3- 4

1 msk. Ítalíu-ólífuolía + klípa smjör
1 laukur
1 sellerístilkur
2 hvítlauksrif
4 dl arborio-hrísgrjón
8 sveppir, smátt skornir
8 dl kjúklingasoð
2 dl hvítvín
salt og pipar
60-80 g parmesanostur
2 msk. sveppatrufflumauk frá Giuliano Tartufi
1 msk. smátt söxuð steinselja

Aðferð:

Hitið ólífuolíu í potti og steikið laukinn, sellerí og hvítlauk í 2-3 mínútur. Bætið smátt söxuðum sveppum út í pottinn og steikið, bætið því næst arborio-grjónum út í og hrærið stöðugt.
Hellið hvítvíninu saman við og leyfið því að sjóða niður, bætið næst kjúklingasoðinu smám saman við og hrærið mjög vel á milli.
Bætið parmesanosti, steinselju og trufflumauki við í lokin og kryddið til með salti og pipar.
Setjið risotto á disk og rífið gjarnan niður parmesan og stráið yfir réttinn í lokin ásamt saxaðri steinselju.