Matur | mbl | 9.5.2023 | 11:00

Fullkomin ídýfa fyrir Eurovision partíið

Þessa ómótstæðilega girnilega taco-ídýfa er fullkomin til að njóta í Eurovision partíinu. Ljósmynd/Berglind Hreiðars

Í kvöld verður fyrri undankeppnin í Eurovision og það kallar á partírétt til að njóta meðan horft er á skjáinn. Kaldar rjómaostadýfur njóta mikilla vinsælda og hér er ein ómótstæðilega girnileg úr smiðju okkar ástsælu Berglindar Hreiðars matarbloggara hjá Gotterí og gersemar. Hér er á ferðinni taco-ídýfa sem er fullkomin á partíborð kvöldsins og tekur ekki langan tíma að framreiða.

Þessi er líka matarmeiri en margar því hún er með hakki sem hentar svo vel þegar boðið er upp á hana á kvöldmatartíma en fyrri undankeppnin í Eurovision í kvöld hefst klukkan 19.00. Ídýfan er toppuð með grænmeti og osti og magnið getur farið eftir smekk hvers og eins. Hver og einn getur útbúið ídýfuna eftir sínu nefi og sett sitt fingrafar á herlegheitin.

Taco ídýfa

350 g rjómaostur við stofuhita
4 msk. salsasósa
400 g nautahakk
½ bréf taco-krydd
Romaine salat
Rifinn ostur
Piccolo tómatar
1 x avókadó
Kóríander
Rauðlaukur
Nachosflögur

Aðferð:

Pískið rjómaost og salsasósu saman og smyrjið í botninn á eldföstu móti/skál/öðru með smá uppháum köntum. Geymið í kæli á meðan annað er undirbúið.
Steikið hakkið og kryddið, kælið það niður og setjið yfir rjómaostablönduna.
Skerið niður grænmetið og setjið það yfir hakkið ásamt ostinum.
Njótið með nachos flögum.