Matur | mbl | 10.6.2023 | 17:00 | Uppfært 11.6.2023 19:59

Girnilegt sumarlegt salat með lambafille og eggaldin

Þetta sumarlega salat með lamdafille er ótrúlega girnilegt og fullkomið til að bjóða upp á í næstu grillveislu. mbl.is/Kristinn Magnússon

Sigríður Björk Bragadóttir matgæðingur og annar eigenda Salt Eldhús, ávallt kölluð Sirrý, veit fátt betra en sumarlegt salat með lambafille þegar sólin byrjar að sýna sig og hækka á lofti. Hér deilir hún með lesendum Matarvefsins einu af sínu uppáhalds sumarsalati.

„Þessi hefur verið með mér ansi lengi og er klassík og er tekin fram þegar sól fer að hækka á lofti. Yndislegur gestaréttur sem er auðvelt að laga fyrirfram nema steikja lambið rétt áður en borið fram. Við borðum mikið salöt á sumrin, svo léttur og góður matur og síðan er gott að fá prótín með því að hafa ost, fisk eða kjöt í salatinu,“ segir Sirrý og hlakkar til að njóta í sumar í sólinni.

„Ef þið viljið baka tómatana sjálf nota ég 500 g af smátómötum sker þá í tvennt og raða með sárið upp á bökunarpappír á ofnplötu. Sáldra ólífuolíu yfir ásamt salti og pipar og baka þá í ofninum við 180°C hita í 30 mínútur, eða þar til þeir eru orðnir vel krumpaðir.“

Sumarlegt salat með lambafille og eggaldin

Fyrir 2

½-1 eggaldin (fer eftir stærð) skorið í fingurþykkar sneiðar
3-4 msk. olía
300 g lambafille, 1 stórt eða tvö minni
1 poki blandað salat, gjarnan með spínati og klettakáli saman við
3 msk. furuhnetur, þurr ristaðar (má líka nota pekan- eða valhnetur)
1 -2 dl sólkysstir tómatar (hálf sólþurrkaðir)
1/2 granatepli, kjarnar úr því
6 msk. góð ólífuolía
2 msk. hindberjaedik eða annað gott edik
Sjávarsalt og nýmalaður pipar

Aðferð:

Hitið ofninn í 180°C.
Steikið eggaldinsneiðarnar á báðum hliðum í olíu, geymið á disk.
Það er smávandi að steikja eggaldin best er að nota “non stick” pönnu og pensla sneiðarnar með olíunni áður er þið byrjið að steikja, pensla svo aftur á miðri leið.
Ekki bæta meiri og meiri olíu á pönnuna eins og virðist þurfa, bara taka tíma í þetta.
Skerið raufar á ská í fituna á lambafille, notið beittan hníf og hafið ½ cm á milli skurða.
Kryddið lambafille með því sem ykkur hugnast, saltið og piprið.
Steikið lambafille á pönnu með fituhliðina niður fyrst og síðan á öllum hliðum þar til þær eru brúnaðar.
Setjið í ofninn í 10-12 mín, tími fer eftir stærðinni á kjötbitanum.
Ef þið eruð með kjarnhitamæli er passlegt að elda þar til kjarnhiti er 56°C.
Takið lambið út og látið hvíla undir klút í 15 mín, það heldur áfram að eldast þar þangað til kjarnhita 64-68°C er náð.
Setjið salatið á fat.
Rífið eða skerið eggaldinsneiðar í tvennt og raðið ofan á.
Skerið lambafille í sneiðar og raðið líka ofan á, mjög gott er að hafa fituhliðina niður því þá verður skurðurinn á helli fallegri.
Dreifið sólkysstum tómötum, furuhnetum og granateplakjörnum ofan á og hellið olíu og hindberjaediki yfir.
Saltið og piprið eftir smekk.
Berið fram með góðu brauði og rauðvíni.