Þessir íslensku veitingastaðir fengu meðmæli frá Michelin

Eins fram kom í gær í frétt á vef mbl.is fékk veit­ingastaður­inn Moss í Bláa lón­inu hina eft­ir­sóttu Michel­in-stjörnu. Viðurkenningin var kunn­gjörð við hátíðlega at­höfn í borginni Tur­ku í Finnlandi sem eru stórkostleg tíðindi fyrir Moss og frábær viðurkenning fyrir Agn­ar Sverris­son yfir­kokk og hans kokkateymi á Moss og ekki síður fyrir íslenska matargerð.

Frétt af mbl.is

Moss hlýtur Michelin-stjörnu

Michel­in-stjarna Moss hef­ur klárlega góð áhrif á íslenska matargerð og er án efa stórfengleg landkynning og eykur metnað margra íslenskra veitingastaða að sækja enn betur fram. Fyrir voru tveir veitingastaðir með eina Michelin-stjörnu, ÓX og Dill Laugavegi.

Veitingastaðirnir fjórir sem fengu meðmæli

Jafnframt fengu nokkrir aðrir íslenskir veitingastaðir til viðbótar meðmæli frá Michelin. Þeir veitingastaðir sem um ræðir eru Brút við Pósthússtræti, Tides á hótel Edition, Sümac á Laugavegi og Matur og drykkur við Grandagarð sem er góð og verðskulduð viðurkenning fyrir íslenska veitingahúsaflóru og öðrum hvatning.

Ólafur Örn Steinunnar Ólafsson veitingamaður á Brút er alsæll með viðurkenninguna frá Michelin. mbl.is/Arnþór Birkisson

Ólafur Örn Steinunnar Ólafsson, veitingamaður á Brút er alsæll með viðurkenninguna: „Að veitingastaður sem er með 100% áherslu á fisk og annað sjávarfang sé partur af þessum meðmælum frá þeim sem hafa mestu þekkingu á gæðum í veitingabransanum í heiminum, er mikil viðurkenning. Ekki bara fyrir okkar veitingastað Brút, heldur fyrir sjávarfang á Íslandi yfir höfuð.“

Hægt er að sjá umfjöllunina um veitingastaðina frá Michelin hér.

• Blogga um frétt