Nú er lag að vinna með einfaldleikann því þessa dagana eru margir í útilegum og ferðalög eru hámæli. Það er alltaf gaman að borða góðan mat og líka á flandri en líka gott að þurfa ekki að hafa of mikið fyrir honum. Ef ykkur langar í gómsæta kjúklingaleggi með BBQ chilli sósu sem þið getið töfrað fram á augabragði eru þessir málið. Það er engin önnur en Berglind Hreiðars ástríðukokkur og matarbloggari sem á heiðurinn að þessari uppskrift. Berglind heldur úti uppskriftar- og bloggsíðunni Gotterí og gersemar.
BBQ chilli kjúllaleggir
- 1,5 kg kjúklingaleggir
- Kjúklingakrydd/steikarkrydd
- Heinz BBQ chilli sósa (um ½ flaska)
- Sesamfræ eftir smekk
- Kóríander eftir smekk
Aðferð:
- Hitið ofninn eða grillið í um 190°C.
- Kryddið leggina vel allan hringinn og raðið á ofngrind (með skúffu undir) eða á grillið.
- Eldið/grillið í um 30 mínútur og berið þá væna umferð af BBQ sósu á leggina og eldið í um fimm mínútur til viðbótar. Munið að snúa leggjunum ef þeir eru á grillinu.
- Þegar leggirnir eru tilbúnir má raða þeim í fat og bera aðra góða umferð af BBQ sósu á þá og strá smá sesamfræjum og kóríander yfir til skrauts.