Silli kokkur með besta götubita landsins í ár

Sigvaldi Jóhannesson, betur þekktur sem Silli kokkur, bar sigur úr býtum um besta götubita landsins á Götubitahátíðinni sem haldin var í Hljómskálagarðinum um helgina með pomp og prakt.

Þá hlaut hann fyrstu verðlaun í keppni um Götubita fólksins, en það fór fram rafræn kosning meðal matargesta um helgina sem fengu að kjósa uppáhaldsbitann sinn og borgarinn hans Silla bar sigur úr býtum í kosningu fólksins.

Hamborgarinn sigursæli er gæsaborgari með klettasalati, sultuðum rauðlauk og reyktri gráðaostasósu. 

Sigraði fjórða árið í röð

Þetta er fjórða árið sem Silli sigrar þessa sívinsælu keppni sem er sú stærsta sinnar tegundar sem haldin er á Íslandi og hefur aldrei verið stærri eins og í ár. „Þátttakan og mætingin á svæðið fór fram úr okkar björtustu vonum en okkur telst að hér hafi mætt rúmlega 60.000 þúsund manns hið minnsta um helgina,“ segir Róbert Aron Magnússon framkvæmdastjóri Götubitahátíðarinnar.

„Annað sem vakti athygli okkar og dómnefndar er metnaður og gæðin sem allir eru að leggja í hráefnið sem og fjölbreytnin í matarflórunni. Boðið var upp á rétti sem eiga uppruna sinn úr öllum heimsálfunum. Gæðin og fjölbreytnin hefur vaxið frá ári til árs og frábært er að sjá og upplifa hvað matarflóran í götubitamat er komin á flottan stað hér á Íslandi.“  Aðspurður segir Róbert að gleðin hafi verið við völd allan tímann og allir séu alsælir með helgina, aðstandendur hátíðarinnar, þátttakendur og matargestir.

Vert er að geta þess að Silli hafnaði í öðru sæti í keppni um besta evrópska götubitann, European Street Food Award 2022, sem haldin var í München í Þýskalandi á síðasta ári og mun keppa aftur í ár. Þá hlaut hann fyrstu verðlaun í keppni um besta hamborgarann og varð auk þess í öðru sæti þegar keppt var um „Götubita fólksins“ í sömu keppni. Hann mun fara út í haust og taka þátt  og það verður spennandi að sjá hvað gerist. 

Gæsaborgarinn hans Silla skaraði fram úr

„Við smökkuðum mikið af frábærum mat og fjölbreyttum en það sem skar úr um Götubitann 2023 var það að það var búið að hugsa svakalega vel út í öll smáatriði enda mikil reynsla á bak við sigurvegarann, Silla kokk sem vann fyrir gæsaborgarann sinn og hann á það svo sannarlega skilið. Hráefnið var allt fyrsta flokks og passaði 100% saman. Við hugsuðum þegar við vorum að dæma: „Langar mig í þetta aftur og aftur?“, sem er öðruvísi en þegar maður dæmir í matreiðslukeppni. Meira svona djúsí matur núna. Við hlökkum til að fylgjast með honum keppa í stóru keppninni um Besta götubitann í Evrópu. Besti smábitinn var eitthvað sem við vorum öll sammála um að væri bestur og sama með besta sæta bitann. Það var gott úrval af góðum grænmetisréttum sem voru mjög góðir í heildina og kannski erfiðast að dæma þar. En þetta var frábær hátíð og ég hlakka til á næsta ári að sjá hvað kemur þá,“ segir Hrefna Sætran formaður dómnefndar.

Dómnefndina á hátíðinni í ár skipuðu Hrefna Sætran matreiðslumeistari frá Grillmarkaðinum og Fiskmarkaðinum, Davíð Örn Hákonarson frá Skreið, Eyþór Mar frá Public House og Jakob E. Jakobsson veitingamaður frá Jómfrúnni.

Besti smábitinn, Sæti bitinn og Grænmetisbitinn

Fleiri verðlaun voru veitt í dag og Besti smábitinn var Tigerball frá KOMO sem er alveg glæný viðbót í götubitaflóruna. Um er að ræða asíska matargerð og allt er handgert.

Sæti bitinn er nýr verðlaunaflokkur en dómnefndin veitti viðurkenningu fyrir besta sæta bitann og hefur framboðið af ljúffengum sætum bitum aldrei verið meira að sögn dómnefndarinnar. 

Don's Dounts hlaut verðlaun fyrir Besta sæta bitann sem er nýbakaður kleinuhringur.

Besti grænmetisbitinn var frá Mitja og hefur úrvalið af grænmetisbitum heldur aldrei verið fjölbreyttara en í ár. Mitja býður upp á kólumbískan götubita og kemur skemmtilega á óvart.