Matur | mbl | 26.7.2023 | 11:00 | Uppfært 11:27

Gómsætt ferskju- og berjapæ Hrefnu Sætran

Hrefna Sætran, matreiðslumeistari og veitingahúseigandi, töfrar hér fram gómsætan grillaðan eftirrétt. Samsett mynd

Himneskt er að njóta góðs eftirréttar á góðum degi og enn þá betra að fá grillaðan eftirrétt. Hér er gómsætur grillaður eftirréttur úr smiðju Hrefnu Sætran, matreiðslumeistara og veitingahúseiganda, sem hún birti á dögunum á Instagram sem á eftir steinliggja í næstu grillveislu. Ómótstæðilega girnilegur að sjá og þessi grilláferð gerir svo mikið.

„Ég elska að grilla eftirrétti. Fá smá grillbragð með sætu og súru en þessi eftirréttur er akkúrat þannig í góðu jafnvægi. Svo er mjög sniðugt að nýta eldinn og hitann sem er búið að kveikja upp í til fulls. Mæli svo með að fá sér þeyttan rjóma eða vanilluís með þessu pæi,“ segir Hrefna sem kann svo sannarlega að töfra fram rétta bragðið fyrir bragðlaukana. Hægt er að fylgjast með Hrefnu á Instagram-reikningnum hennar @hrefnasaetran.

Ómótstæðilega girnilegt ferskju- og berjapæ úr smiðju Hrefnu. Ljósmynd/Hrefna Sætran

Gómsætt ferskju- og berjapæ

Fyrir 8

3 bollar frosin ber að eigin vali (ég notaði svona tilbúna blöndu af berjum)
4 stk. ferskjur
Safinn og börkurinn af einni sítrónu
180 g sykur

Aðferð:

Skerið ferskjurnar í báta og setjið í skál ásamt berjunum, sykrinum, sítrónusafanum og fínt röspuðum berkinum af sítrónunni.
Setjð blönduna í steypujárnspönnu ef þið eigið eða bara álbakka eða eitthvað sem þolir vel hita.

Deigið:

120 g hveiti
2 msk. sykur
2 tsk. lyftiduft
Smá salt
110 g smjör
120 g súrmjólk
Litlir sykurpúðar

Aðferð:

Blandið saman þurrvörunum í skál.
Skerðið kalt smjörið niður í kubba og hnoðið því saman við þurrvörurnar þar til úr verður mylsna.
Bætið þá súrmjólkinni út í og blandið vel saman.
Dreifið úr deiginu yfir berjablönduna. Bakið svo á grilli með lokinu yfir (eða inn í ofni) í 20-30 mínútur.
Bætið sykurpúðunum yfir í lokin og grillið áfram í nokkrar mínútur.
Berið fram með þeyttum rjóma eða vanilluís og njótið.