Matur | mbl | 28.7.2023 | 18:00

Tryllingslega gott Tabasco-popp á 5 mínútum

Gamla góða poppkornið svíkur engan. Ljósmynd/Unsplash/Mahmoud Fawzy

Poppkorn hefur lengi verið eitt vinsælasta snarl í heimi og það er ekki að ástæðulausu. Poppkorn má bragðbæta með ýmsum hætti og getur verið gaman að leika sér með bragðið á hinni fullkomnu poppskál. Sumir sækjast eftir því að hafa poppið sætt en aðrir leitast eftir einhverju aðeins sterkara og enn aðrir kjósa að hafa sterkt og sætt í bland. Hér er að finna fljótlega uppskrift að skotheldu poppi fyrir áhugasama um sterkan mat.

Sterkt og sætt Tabasco-poppkorn

1 poki Orville-örbylgjupopp
½ -1 tsk. Tabasco Habanero-sósa
2 msk. smjör
Ein lúka af M&M með hnetusmjöri (má sleppa).

Aðferð:

Smjörið brætt í örbylgjuofni. Mikilvægt er að hafa smjörið í skál sem þolir örbylgjur.
Því næst er Tabasco-sósunni hrært vel saman við smjörið.
M&M-ið skorið smátt.
Poppið látið poppast í örbylgjuofni samkvæmt leiðbeiningum og sett í stóra skál.
Tabasco- og smjörblöndunni hellt jafnt yfir poppið og hrært saman við.
M&M-ið skorið niður og stráð yfir.