Fiskur er herramanns matur og gaman að njóta þess að borða fisk þar sem bragðið lyftir manni upp á hæstu hæðir. Þessi maríneraði steikti fiskur er guðdómlega góður. Fiskurinn er í senn bragðmikill og auðveldur að gera. En galdurinn hér er að marínera fiskinn í hvítlauks grillolíu sem gefur tóninn. Þessi dásamlega uppskrift kemur úr smiðju eldhúsgyðjunnar og fagurkerans Maríu Gomez sem heldur úti matar- og lífsstílssíðunni Paz.is. Allt sem hún gerir er svo vandað, ljúffengt og fallega borið fram.
Því lengur sem fiskurinn liggur í maríneringunni, því betra. María hefur hann stundum yfir nótt eða frá morgni fram að kvöldverði í maríneringunni. Allra best er að leyfa fiskinum að marínerast í allavega 2-4 klukkustundir.
Maríneraður steiktur fiskur með bræddu hvítlaukssmjöri
Marínering
- 1-2 dl Caj P BBQ olía með hvítlauk
- 1 msk. sojasósa
- 3-4 marin hvítlauksrif
- 1 tsk. sítrónusafi
- 1 msk. hunang
- Klípa af grófu salti
- pipar
- smá chiliflögur (val ef þið viljið hafa fiskinn sterkan)
- 500 g hvítur fiskur, þorskhnakkar eða ýsa
Bráðið hvítlaukssmjör
- 80 g smjör
- 3 marin hvítlauksrif
- ½ msk. nýkreistur sítrónusafi
- 2 tsk. þurrkuð steinselja
Annað
- 1 dl maizena mjöl eða kartöflumjöl og meira ef þarf
- 4 msk. góð matarolía en það er líka gott að nota 3 msk. matarolíu og 1 msk. sesamolíu
Aðferð:
- Setjið Caj p grillolíuna í grunna skál og merjið hvítlauksrifin út í (hristið Caj P olíuna vel áður en sett er í skálina).
- Blandið svo restinni af innihaldsefnum úr maríneringunni saman við og hrærið vel saman.
- Leggið fiskinn á eldhúspappír til að ná sem mestum raka úr honum og skerið hann svo í langa mjóa bita.
- Setjið fiskbitana út í maríneringuna helst í 2-4 klst í ísskáp, best ef hægt er yfir nótt eða frá morgni að kvöldmatartíma.
- Þegar steikja á fiskinn setjið þá maizena eða kartöflumjöl á matardisk.
- Hitið svo olíu á pönnu og veltið einum fiskbita í einu upp úr mjölinu (passa að láta sem mest af maríneringunni leka af fiskinum) og setjið svo beint út í heita olíuna.
- Steikið fiskinn þar til hann hefur fengið á sig fallegan appelsínugylltan lit og setjið svo á disk með eldhúspappír á til að umfram olía fari í pappann.
- Meðan fiskurinn er steiktur er gott að gera hvítlaukssmjörið til á meðan.
- Setjið smjörið í pott og bræðið en ekki sjóða, slökkvið undir þegar smjörið hefur bráðnað
- Merjið næst hvítlauksrifin út í smjörið og setjið restina af hráefnum saman við og hrærið vel saman, setjið í skál og leggið til hliðar.
- Þegar fiskurinn er til og kominn á disk er best að hella hvítlaukssmjörinu yfir hann heitan og bera afganginn af smjörinu fram með réttinum.
- Maríu finnst best að hafa ofnbakað smælki velt upp úr olíu og salti með honum og hella hvítlaukssmjörinu yfir þær líka þegar þær eru til.
- Berið fram á fallegan og aðlaðandi hátt.
Fiskurinn er stökkur og bragðgóður.
Ljósmynd/María Gomez