Matur | mbl | 22.8.2023 | 21:00 | Uppfært 23.8.2023 3:19

Matarmiklar ciabatta-samlokur fyrir sælkera

Valgerður Gréta Gröndal er mikill sælkeri og elskar matarmiklar samlokur eins og þessar. Samsett mynd

Sælkerar eru iðulega mikið fyrir matarmiklar samlokur og elska að útbúa slíkar samlokur í nestistöskuna. Þessar er hægt að taka með í nesti í vinnuna, skólann eða hreinlega skella sér í lautarferð og njóta. Valgerður Gröndal, alla jafna kölluð Valla, sem heldur úti uppskriftasíðunni Valla Gröndal, notar ýmist ciabatta-brauð eða gott snittubrauð í meðfylgjandi uppskrift og fyllir þær með alls konar áleggi, grænmeti og sósu.

Í þessar matarmiklu og gómsætu samlokur setti Vallabeikon, ferskt salat, tómata, rauðlauk, avókadó og hvítlaukssósu. Það er einnig hægt að nýta afganga, t.d. af grillinu daginn áður, og búa þannig til eitthvað alveg nýtt og girnilegt úr þeim.

Ciabatta-samlokur með grilluðu grísakjöti, beikoni, avókadó og tómötum

4 ciabatta-brauð eða 2 snittubrauð
3 grísakótilettur með suðrænni kryddblöndu frá Kjarnafæði eða annað grillkjöt
8-10 eldaðar beikonsneiðar
hvítlaukssósa að eigin vali
ferskt salat
4 tómatar
1 avókadó, skorið í sneiðar
salt og pipar eftir smekk

Aðferð:

Byrjið á því að elda beikonið og grilla grísakjötið.
Skerið grænmetið niður og setjið til hliðar.
Skerið brauðin langsum og smyrjið ríflega með hvítlaukssósunni.
Raðið álegginu á samlokurnar, saltið og piprið yfir og lokið.
Ef þið ætlið að taka samlokurnar með í nestistöskuna, pakkið þeim þétt inn en annars skal bera þær strax fram.