Matur | mbl | 8.9.2023 | 14:00

Samfélagsmiðlastjarna töfrar fram rifjapottrétt

Þeir sem elska svínarif ættu að prófa þennan girnilega rifjapottrétt sem lagaður er frá grunni af samfélagsmiðlastjörnunni Alinu Prokuda. Samsett mynd

Nú þegur tekur að hausta og daginn fer að stytta þá er tilvalið að gera haustlega rétti í eldhúsinu. Þeir sem elska svínarif ættu að prófa þennan girnilega rifjapottrétt sem lagaður er frá grunni af samfélagsmiðlastjörnunni Alinu Prokuda. Þvílík snilld að horfa á hana töfra fram þennan ómótstæðilega rétt og hún er með aðferðina á hreinu. Þetta er rétturinn sem steinliggur um helgina.

Rifjapottréttur af bestu gerð

2 kg heil óelduð svínarif
¼ bolli sojasósa
¼ bolli hoisin sósa
¼ bolli hunang
¼ bolli púðursykur
¼ bolli eplaedik
2 msk. jurtaolía
2 msk. rifið ferskt engifer
2 hvítlauksrif, söxuð
1 msk. Miso púrra (Miso paste)
½ tsk. kínversk fimm kryddblanda (kínversk kryddblanda sem inniheldur fimm krydd og dregur nafn sitt af því. Blandan er klassísk á svínakjöt og á önd)
¼ tsk. cayenne pipar
salt og svartur pipar eftir smekk

Aðferð:

Undirbúið rifin með því að skera þau í aðskilda bita líkt og sýnt er í myndbandinu hér fyrir neðan.
Þeytið saman sojasósu, hoisinsósu, hunangi, púðursykri, eplaediki, jurtaolíu, engifer, hvítlauk, miso púrru, kínversku fimm kryddblönduna og cayennepipar í skál.
Skilið eftir ¼ bolla af maríneringunni til að nota síðar.
Hellið sósunni yfir rifin, passið að þau séu fullhúðuð og látið marínerast í um það bil 3 klukkustundir eða lengur.
Forhitið ofninn í 180°C.
Setjið rifin í keramikpott með loki inn í ofn og eldið með lokinu á í um það bil 2 klukkustundir.
Fjarlægið lokið og hækkið ofnhitann í 200°C.
Penslið rifin með restinni af maríneringunni og bakið í 10-15 mínútur til viðbótar eða þar til rifin eru klístruð og karamelliseruð.
Fjarlægðu rifin úr pottinum. Setjið restina af sósunni úr pottinum á meðalhita í 6 mínútur til að karamellisera og hellið svo yfir rifin.
Raðið rifunum fallega upp á fat eða kringlóttan disk og skreytið rifin með lauksneiðum og sesamfræjum áður en þau eru borin fram.
Upplagt að bera fram ektar steikarfranskar, grillaðan maís eða ferskt salat með rifjunum og njóta.