Í tilefni að útgáfu bókarinnar Ómótstæðilegir eftirréttir bauð Ólöf Ólafsdóttir konditori og eftirréttadrottning Íslands ásamt móður sinni Ruth Ásgeirsdóttur ljósmyndara og Edda útgáfa í heljarinnar útgáfuhófs á veitingastaðnum OTO við Hverfisgötu. Það má með sanni segja að þetta hafi verið eitt bleikasta útgáfuhóf sem haldið hefur verið, staðurinn var fallega skreyttur þar sem bleiki liturinn var í forgrunni.

Boðið var upp á bleikar kræsingar og bleikar búbblur svo fátt sé nefnt og veitingarnar slógu svo sannarlega í gegn. Bókin rauk út eins og heitar lummur líkt og bleiku eftirréttirnir sem glöddu alla viðstadda. Ólöf er annáluð fyrir kunnáttu sína í eftirréttagerð og þekkt fyrir að galdra fram dýrindis eftirrétti sem gleðja bæði auga og munn. Vert er að geta þess að hún er nýr meðlimur í íslenska kokkalandsliðinu og er á leið út á Ólympíuleikana í Stuttgart í febrúar 2024. Þetta er fyrsta bók Ólafar og er uppskriftabók sem ber nafn með rentu. 

Bókin einstaklega falleg og inniheldur fjölbreytta flóru af eftirréttum

Það er deginum ljósara að bókin hennar Ólafar á eftir að slá í gegn líkt og hún hefur gert með eftirréttum sínum. Bókarkápan er einstaklega falleg og myndirnar listaverk, hver einasti réttur fangar augað og vekur áhuga. Móðir Ólafar, Ruth, tók allar myndirnar í bókinni þar listrænir hæfileikar hennar skína í gegn og ljóst að mæðgurnar hafa unnið gott verk saman. Bókin er stútfull af uppskriftum, fróðleik og tækni. „Mig langaði að gera bók sem væri ekki bara fyrir áhugabakara heldur einnig fyrir bakara sem vilja ganga skrefinu lengra og vinna sig áfram með fjölbreyttar uppskriftir,“ segir Ólöf.

Eins og litla barnið mitt

„Tilfinningin að vera komin með fyrstu bókina í hendurnar er nánast óraunveruleg, hún tók 9 mánuði frá byrjun til enda og bókin er nánast eins og litla barnið mitt. Hún er flottari en ég gat nokkurn tíman ímyndað mér að hún gæti orðið og ég er mjög stolt af henni,“ segir Ólöf. 

Aðspurð segir Ólöf að hún hafi verið hrærð yfir viðbrögðum gesta og hversu margir komu og fögnuðu með henni og móður hennar í tilefni útgáfu eftirréttabókarinnar. „Það sem mér fannst standa upp úr varðandi útgáfuteitið var hversu margir komu og hvað ég er ótrúlega heppin með fólkið í kringum mig. Ég er svo þakklát fyrir alla og sérstaklega fólkið sem stóð mér við hlið í gegnum allt.“