Matur | mbl | 14.10.2023 | 20:00

Skelfilegasta matarupplifunin grillaðar lifrar hjá pabba

Helga Magga segist vera snillingur að gera mat úr engu og segir hér frá matarvenjum sínum og hefðum. Ljósmynd/Helga Magga

Helga Magga segir frá sínum matarvenjum og skemmtilegum hefðum tengdum mat. Helga Magga er næringarþjálfari og áhugamaður um næringu og góðan mat. Hún úti heimasíðunni Helga Magga þar sem hún deilir næringarríkum uppskriftum. Þá er hún einnig með Instagramið Helga Magga þar sem hún deilir uppskriftum, næringunni sinni yfir daginn og oft einhverju fyndnu inn á milli að eigin sögn.

Hvað færðu þér í morgunmat?

„Ég fæ mér yfirleitt hafragraut í morgunmat svona um klukkan 9:30 þegar allt er dottið í dúnalogn á heimilinu, allir komnir á sinn stað. Hafragrauturinn er 40 g haframjöl, 5 g chiia fræ blandað saman við heitt vatn, látið bíða í 5 mínútur, þá set ég 25 g af vanillupróteini út í og set svo yfirleitt eplabita ofan á og smá kanil.“

Borðar þú oft á milli mála og hvað þá helst?

„Svolítið erfitt að segja hvað er milli mála, ég er borðandi allan liðlangan daginn. Já, ætli svarið sé ekki já og ég reyni að hafa millimálið próteinríkt. Skyrdós með smá granóla eða ristað brauð með kotasælu er millimál sem ég gríp oft í.“

Finnst þér ómissandi að borða hádegisverð?

„Nei, ekkert endilega, ég passa mig bara vel að borða vel yfir daginn hvort sem það er í hádeginu eða seinnipartinn, þá lendi ég síður á vegg seinnipartinn eða í kex skúffunni.“

Hvað áttu alltaf til í ísskápnum?

„Kotasælu og skyr.“

Uppáhaldsgrillmaturinn þinn?

„Próteinpitsan mín, þessi hér. Eða kjúklingabringur, eitthvað sem krakkarnir elska að borða.“

Finsen á Pósthúsinu þegar ég vil gera vel við mig

Þegar þú ætlar að gera vel við þig í mat og drykk og velur veitingastað til að fara á hvert ferðu?

„Þá fer ég á Finsen í Pósthúsinu Foodhall, mathöllinni við Pósthússtræti.“

Er einhver veitingastaður úti í heimi sem er á bucket-listanum yfir þá staði sem þú verður að

heimsækja?

„Nei, ekki beint en mér finnst mjög gaman að prófa nýja staði þegar ég er erlendis. Pitsustaðir eru í uppáhaldi, á Spáni í sumar fékk ég eina af bestu pitsum sem ég hef smakkað en einnig þá verstu á öðrum stað, svo þetta getur oft verið skrautlegt.“

Hvaða matarupplifun stendur upp úr í lífi þínu?

„Stórt er spurt, það má segja frá skelfilegustu matarupplifuninni, þegar pabbi var alltaf að grilla lifur í gamla daga. Úff, þetta stendur klárlega upp úr hjá mér.“

Hvað er það versta sem þú hefur bragðað?

„Lifur.“

Uppáhaldskokkurinn þinn?

„Enginn sérstakur.“

Uppáhaldsdrykkurinn þinn?

„Vatn og freyðivín.“

Klárlega góður kokkur, snillingur að gera mat úr engu

Ertu góður kokkur?

„Alveg klárlega, svo er ég snillingur í að búa til mat úr engu og óhrædd við að prófa nýja hluti. Ég hvet fólk til að fylgjast með heimasíðunni minni og Instagraminu, alltaf eitthvað nýtt á leiðinni og þar er hægt að fylgjast með mér í eldhúsinu.“