Matur | mbl | 16.11.2023 | 11:00

Ljúffengur nautapottréttur í rauðvínssósu

Unaðslega ljúffengur nautapottréttur í rauðvínssósu og kartöflumús á vel við á fallegu vetrarkvöldi. Ljósmynd/Berglind Hreiðars

Þessi nautapottréttur er unaðslega ljúffengur og á vel við á fallegu vetrarkvöldi. Pottréttur og kartöflumús er fullkomin blanda til að njóta í faðmi fjölskyldunnar við huggulegheit og kertaljós. Heiðurinn af þessari uppskrift á Berglind Hreiðars lífsstíls- og matarbloggarinn sem allir þekkja hjá Gotterí og gersemar. Berglind kann sitt fag vel og er líka fagurkeri sem ber matinn fallega fram á borð.

Nautapottréttur í rauðvínssósu

Fyrir 6

Pottréttur

1,2 kg nautainnlæri (í sneiðum), eða annað svipað nautakjöt
1 stór laukur
500 g gulrætur
4 hvítlauksrif
60 g hveiti
750 ml vatn
50 ml Oscar fljótandi nautakraftur
500 ml Muga rauðvín eða rauðvín að eigin val
2 msk. tómatpúrra
4 lárviðarlauf
3 timiangreinar
Steikarkrydd
Salt + pipar
Ólífuolía til steikingar

Aðferð:

Skerið kjötið í bita (c.a 5 x 5 cm)
Steikið það upp úr ólífuolíu, brúnið vel og kryddið eftir smekk. Steikja þarf kjötið í 2-3 skömmtum og geymið bitana síðan til hliðar á disk.
Skerið laukinn niður í sneiðar og gulræturnar í bita, setjið í pottinn sem þið steiktuð kjötið í án þess að þrífa hann á milli.
Bætið aðeins ólífuolíu saman við og leyfið að malla við meðalhita þar til laukurinn mýkist, rífið hvítlaukinn einnig saman við í lokin.
Stráið hveitinu næst yfir grænmetið og hrærið aðeins í öllu saman og hellið síðan vatni, nautakrafti, rauðvíni og tómatpúrru saman við og hrærið vel saman.
Setjið kjötið nú aftur í pottinn ásamt lárviðarlaufum og timian, náið suðunni upp að nýju og lækkið síðan alveg niður, setjið lokið á pottinn og leyfið að malla í 2 klukkustundir.
Sjóðið kartöflur fyrir kartöflumúsina svo þær séu tilbúnar að þessum 2 klukkustundum liðnum.
Takið lokið af pottinum eftir 2 klukkustundir og leyfið að malla áfram í um 15-20 mínútur á meðan þið útbúið kartöflumúsina.
Saltið mögulega aðeins meira eða bætið við nautakrafti, allt eftir smekk.

Kartöflumús

1,3 kg kartöflur
50 g smjör
2 msk. sykur
1 tsk. salt
200 ml nýmjólk

Aðferð:

Sjóðið og flysjið kartöflurnar (eða öfugt, það má líka).
Setjið þær í hrærivélarskálina ásamt smjöri, sykri og salti og blandið saman á lægstu stillingu.
Bætið mjólkinni saman við í nokkrum skömmtum og skafið niður á milli.
Berið fram með pottréttinum og njótið vel.