Matur | mbl | 27.11.2023 | 11:00

Milljón dollara ídýfa

Syndsamlega ljúffeng ídýfa sem á eftir að slá í gegn í öllum boðum. Ljósmynd/Thelma Þorbergsdóttir

Þessi ídýfa toppar allar ídýfur, enda fékk hún nafnið milljón dollara ídýfa hjá Thelmu Þorbergsdóttur uppskriftahöfundi sem á heiðurinn af uppskriftinni. Thelma heldur úti uppskriftasíðunni Freistingar Thelmu. Ídýfan slær alltaf í gegn og er það fyrsta sem klárast á veisluborðinu. Ídýfan er fljótgerð og einstaklega góð með snakki eða kexi við hvaða tilefni sem er.

Milljón dollara ídýfa

250 g rjómaostur
1 dós sýrður rjómi 10%
1 pk. Kims dipmix með sýrðum rjóma og púrrulauk
170 g rifinn 4 osta blanda frá Gott í matinn
½ rauðlaukur
6 stk. beikonsneiðar
Graslaukur

Aðferð:

Hitið ofninn í 200°C, setjið bökunarpappír á bökunarplötu og eldið beikonið þar til það er orðið stökkt.
Leyfið beikoninu að kólna.
Setjið rjómaost, sýrðan rjóma og Kims dipmix í matvinnsluvél og hrærið þar til allt hefur blandast vel saman.
Hér má einnig blanda saman við rauðlauk, beikoni og osti og láta matvinnsluvélina vinna blönduna í mjúka og slétta ídýfu.
Fyrir þá sem vilja smá stökkt undir tönn er betra að skera rauðlauk og beikon smátt niður og blanda saman við með sleif, ásamt ostinum.
Setjið í skál og skreytið með stökku beikoni, graslauk og osti.
Gott er að bera fram t.d. með salti og pipar, snakki eða góðu kexi.