Matur | mbl | 10.12.2023 | 21:00 | Uppfært 11.12.2023 12:33

Guðdómlega góð sjávarréttasúpa

Sjávarréttasúpa sem passar vel á þessum árstíma, yljar og gefur orku. Ljósmynd/Ingunn Mjöll

Þessi sjávarréttasúpa er guðdómlega góð og er alls ekki flókið að gera hana. Uppskriftina er að finna á uppskriftasíðunni hennar Ingunnar Mjalla og ber heitið Íslandsmjöll. Uppskriftin er frá Helgu Sigurðar sem gaf út fyrstu matreiðslubókina hér á landi. Þið getið valið meðlætið sem ykkur finnst passa best saman, til að mynda verið með salatblöð rifin, fetaost í kryddolíu, tómata, rauðlauk og ólífur svo fátt sé nefnt. Gott er að bera súpuna fram með söxuðu fersku kóríander.

Sjávarréttasúpa

2 dósir Hunt‘s Orginal Carlic eða öðru sambærilegu
3 bollar vatn
½ bolli laukur, smátt saxaður
½ bolli gulrætur saxaðar, þunnar sneiðar
½ bolli paprika, smátt söxuð
1 peli rjómi
½ kjúklingatengur (Knorr 1/1)
1 msk. púðursykur
Cayenne pipar eftir smekk
250 g rækja eða annar fiskur, hörpuskel, krabbakjöt, lúða
Má vera bland af öllu.
Ferskt kóríander eftir smekk.

Aðferð:

Steikið grænmetið í potti og setjið tómatkryddsósuna út í.
Bætið hinu út í nema rækjunum og hrærið vel saman.
Látið sjóða við vægan hita í 20-30 mínútur.
Setjið rækjurnar út í þegar súpan er fullsoðin, en ef notaður er fiskur þá má setja hann út í, í bitum fimm mínútum áður en súpan er tekin af hellunni.
Berið fram með því meðlæti sem bragðlaukarnir girnast og njótið.