Matur | mbl | 15.12.2023 | 6:00

Rauðkálið hennar mömmu best

Mörgum finnst ómissandi að bjóða upp á heimalagað rauðkál með jólasteikinni. Ljósmynd/Hanna

Þessi uppskrift kemur frá mömmu Hönnu Thordarson keramiker sem heldur úti uppskriftasíðunni Hanna.is en Hanna er iðin við að safna uppskriftum úr smiðju móður sinnar sem minna hana á bernskuna. „Ég hef prófað ýmsar tegundir af rauðkálsuppskriftum en þessi finnst mér alltaf best. Ilmurinn er alveg ómissandi á aðfangadag á mínu heimili,“ segir Hanna og brosir. Rauðkálið passar vel með hamborgarhryggnum, svínabóginum og hangikjötinu.

Rauðkálið hennar mömmu

600-800 g rauðkálshöfuð
2 msk. smjör
2 græn epli, flysjuð og kjarnhreinsuð, skorin í bita
1 laukur, saxaður
1 tsk. salt
1-2 msk. síróp eða sykur (það er smekksatriði hversu sætt rauðkálið á að vera)
½-1 dl edik (t.d. eplaedik) eða rauðrófusafi
1-2 dl vatn

Aðferð:

Skerið rauðkálið í tvennt, skerið kjarnann í burtu og sneiðið kálið í þunnar ræmur og steikið í smjöri.
Bætið við eplum og lauk og hrærið vel.
Setjið salt, sykur, edik og vatn út í og látið malla í 45-60 mínútur undir loki þar til þetta er orðið mjúkt. Hrærið í annað slagið.
Takið lokið af og látið vatnið gufa upp.
Berið fram með því sem smekkurinn ykkar girnist.