Hátíð var í bæ á Borg Restaurant 20. desember síðastliðin þar sem Jólabolla Barþjónaklúbbs Íslands fór fram. Bollan er árlegur góðgerðaviðburður, en í ár rann allur ágóði til Mæðrastyrksnefndar Reykjavíkur. Gestir gátu því gætt sér á ljúffengum jóla-bollum og á sama tíma styrkt gott málefni! DJ De La Rosa sá gestum fyrir ljúfum tónum til þess að koma fólki í jólaskapið.

Eggnog jólabollan sigraði

Alls tóku átta veitingahús og barir þátt og kepptu við hvort annað um hver var með bestu jólabolluna og var markmið þeirra að draga sem flesta á sinn bás og safna saman drykkjarmiðum sem seldir voru í dyrunum. Staðirnir sem tóku þátt í ár voru eftirfarandi:

• · Héðinn
• · Bingo
• · Blik
• · Drykk
• · Jungle
• · Nauthóll
• · Reykjavík Cocktails
• · Bragginn

Sá staður sem reiddi fram mest að bollu og endaði þannig sem sigurvegari var enginn annar en barinn sem kemur til þín, Reykjavík Cocktails. Þeir voru með ljúffenga „plantation Egg-Nogg bollu" sem þyrstir gestir fengu hreinlega ekki nóg af. Verðlaunin voru ekki í verri kantinum en sigurvegarinn fékk að afhenda allan ágóða kvöldsins til Mæðrastyrksnefndar Reykjavíkur í formi risastórar ávísunar. Alls voru um 300 drykkir reiddir fram um kvöldið og safnaðist því 231.000,- krónur.

Ljótasta jóladressið

Einnig fór fram keppnin um ljótasta/flottasta jóla ,,dressið‘‘ en það var hann Karl Pálsson (Kalli) sem sem kom, sá og sigraði. Fékk hann að verðlaunum fljótandi veigar frá Mekka Wines & Spirits.