Matur | mbl | 3.1.2024 | 11:30 | Uppfært 4.1.2024 10:20

Aspas- og skinkulengja fullkomin í næsta pálínuboð

Brauðrétir eins og þessir hitta ávallt í mark og tekur stutta stund að útbúa. Ljósmynd/Ingunn Mjöll

Aspas- og skinkulengjan hennar Ingunnar Mjallar sem heldur úti uppskriftasíðunni Íslandsmjöll nýtur ávallt mikilla vinsælda. Aspas- og skinkulengjuna, eða öðru nafni Aspasstykki eins og margir þekkja það undir, er frekar einfalt og fljótlegt að útbúa. Þetta er alveg dásamlega gott í hvaða veislu, saumaklúbb og pálínuboð sem er eða bara til að njóta með sjálfum sér og gera sér dagamun.

Aspas- og skinkulengja

1 stk. snittubrauð, skorið í þrjá parta og svo í miðju eins og sjá má á mynd fyrir neðan
1 dós aspas (hefðbundin stærð að dós)
1 pk. skinka, eða um 200 g
1 pk. skinkumyrja eða annar smurostur eftir smekk
Paprikukrydd eftir smekk
Mozzarellaostur eða gratínostur
Vorlaukur til skrauts

Aðferð:

Bræðið ostinn á vægum hita og bætið saman við safa af aspasnum til að þynna örlítið eða eftir því sem ykkur þykir hæfilegt. Passið samt að hafa þetta ekki of þunnt.
Skerið skinkuna í smáa bita og bætið saman við.
Bætið síðan hluta af aspasnum saman við eða eins mikið og þið viljið hafa (hægt er að nýta afganginn í aspassúpu ef vill).
Kryddið með paprikukryddi eftir smekk.
Stráið svo mozzarellaosti eða gratinosti yfir og setjið inn í ofn á 180°C hita í um það bil 20-25 mínútur eða þar til osturinn og brauðið er orðið gullinbrúnt á lit.
Skreytið að vild, berið fram heitt og njótið.