Matur | mbl | 12.1.2024 | 20:00

Grissini ítalskar brauðstangir sem þið eigið eftir að elska

Þessar dásamlegu brauðstangir eiga vel við með ítölskum kræsingum. Ljósmynd/Árni Þorvarðarson

Eins og hefð er uppskrift fyrir helgarbaksturinn úr smiðju bakarans Árni Þorvarðarsonar sem einnig er kennari við Hótel- og matvælaskólann. Að þessu sinni deilir hann með lesendum uppskrift að ítölskum brauðstöngum sem bera heitið Grissini og passa til að mynda einstaklega vel á ítalska veisluplatta með ostum, hráskinku, pylsum og ólífum. Nú er fram undan handboltaveisla á skjánum þar sem EM er komið á fullt og þá er lag að töfrar fram kræsingar til að bjóða upp á til að njóta með horft er á strákana okkar keppa. Eða í næsta partí eða matarboði.

Ómissandi á matarborð Ítala

Grissini er ómissandi á matarborð Ítala þar sem ítölsku brauðstangirnar eru fastur fylgihlutur með kjöti og ostum eða jafnvel eitt og sér. Grissini hefur verið hluti af ítalskri menningu í meira en 3.000 ár. Grissini er búið til með einfaldri uppskrift sem inniheldur hveiti, ger, vatn og ólífuolíu. Úr hráefnunum er búið til deig sem síðan er mótað í þunnar pylsur og teygt út. Oft er bætt við sesamfræjum og kryddjurtum og síðan eru þau sett í ofninn þar til þau verða stökk.

Í kjölfar verðbólgutímabils á Ítalíu fóru bakarar að framleiða brauð í smærri útgáfum en áður. Fólk fór þá að taka upp á því að kalla brauðið „grissino“ sem á ítölsku þýðist sem smærri. Grissini á sér áhugaverða sögu sem gaman er að fræðast um og eru sögurnar fjölbreyttar eins og þær eru margar.

Um helgina er upplagt að baka þessar og bjóða upp á í næsta partíi eða sælkeraboði. Ljósmynd/Árni Þorvarðarson

Grissini ítalskar brauðstangir

550 g hveiti
7 g pressuger
2 ½ dl vatn
1 dl ólífuolía
45 g smjör
2 tsk. salt

Aðferð:

Notið hrærivél með deigkróknum, blandið öllu hráefninu saman á lágum hraða þar til það hefur blandast vel saman, 2-3 mínútur. Aukið hraða hrærivélarinnar í miðlungs-lágan og blandið í 5 mínútur í viðbót.
Látið standa á borði í 15 mínútur
Rúllið deigið út á bökunarplötuna og látið hefast undir plasti í 30 mín
Forhitið ofninn í 190°C.
Gott er að pensla brauðstangirnar með ólífuolíu og strá parmesanosti eða sesamfræjum yfir.
Skerið með pitsahjóli í passlegar stærðir.
Raðið á bökunarplötu klædda bökunarpappír og setjið inn í ofn.
Bakið í 20-25 mínútur eða þar til brauðstangirnar eru ljósgylltar og stökkar.
Gott er að skera aftur í deigið með pitsahjólinu áður en það kólnar. Þetta kemur í veg fyrir að þær festist saman.
Takið í sundur og leyfið að þorna áður en pakkað.
Berið fram með ítölsku kræsingum eða góðri máltíð eins og spaghettí bolognese eða lasagna eða það sem matarhjartað girnist.