Matur | mbl | 31.1.2024 | 11:00

Gratínerað gnocchi með hakki og ostasósu

Ljúffengt gratínerað gnocchi með hakki og ostasósu. Ljósmynd/Helena Gunnarsdóttir

Þessi guðdómlegi réttur á vel við í miðri viku fyrir alla fjölskylduna meðan vetur konungur lætur í sér heyra. Huggulegur heimilismatur eins og hann gerist bestur. Það má auðvitað nota hvaða pasta sem er í réttinn en litlir ferskir dúnmjúkir gnocchi koddar taka þetta samt upp á annað stig. Heiðurinn af þessari uppskrift á Helena Gunnarsdóttir uppskriftahöfundur en uppskriftina gerði hún fyrir uppskriftasíðuna Gott í matinn.

Gratínerað gnocchi með hakki og ostasósu

500 g nautahakk
1 stk. laukur
2 stk. hvítlauksrif
2 msk. tómatpaste
1 dós hakkaðir tómatar
1 dl vatn
1 stk. nautateningur eða 1 tsk. nautakraftur
1 tsk. oreganó
Salt og pipar eftir smekk
500 g ferskt gnocchi

Ostasósa

200 g kotasæla
200 g rjómaostur með graslauk og lauk frá MS
1 pk. 4 osta blanda frá Gott í matinn
Smá pipar

Aðferð:

Hitið ofn í 220°C með blæstri.
Steikið hakkið á pönnu þar til brúnað. Bætið smátt söxuðum lauk á pönnuna ásamt hvítlauk. Kryddið með salti og pipar og steikið aðeins áfram.
Bætið tómatpaste á pönnuna ásamt hökkuðum tómötum. Skolið dósina að innan með 1 dl af vatni og bætið á pönnuna.
Kryddið með nautakrafti, oreganó og saltið og piprið eftir smekk.
Leyfið að malla í 15 mínútur við vægan/meðalhita þannig að sósan þykkni aðeins.
Hrærið saman kotasælu, rjómaosti og hálfum poka af 4 osta blöndu.
Kryddið með smá pipar og setjið til hliðar.
Sjóðið pastað eftir leiðbeiningum á pakka og bætið því svo út á pönnuna og blandið saman við hakksósuna.
Setjið vænar skeiðar af ostasósunni svo ofan á hakkið og pastað og toppið loks með restinni af rifna ostinum.
Bakið í ofni í 5-10 mínútur eða þar til osturinn er gullinbrúnn.
Það getur verið gott að hita grillið í ofninum síðustu mínúturnar til að fá extra stökkan ost.
Berið fram með fersku salati ef vill og nýbökuðu brauði.