Matur | mbl | 25.3.2024 | 14:00 | Uppfært 26.3.2024 10:07

Ofnbökuð langa í Balí-sósu

Ofnbökuð langa í Balí-sósu sem bráðnar í munni og allir ráða við að gera. Ljósmynd/Ingunn Mjöll

Hér er á ferðinni ljúffengur fiskréttur, ofnbökuð langa í Balísósu sem bráðnar í munni og er ótrúlega auðvelt að gera. Ingunn Mjöll Sigurðardóttir sem heldur úti uppskriftasíðunni Íslandsmjöll elskar fátt meira en að prufa nýja rétti og er iðin að stytta sér leið í eldamennskunni. Í þessu fiskrétti lagði hún upp með að vera með „Tikka Masala“-sósuna frá Toro en breytti síðan snögglega í Balísósuna þar sem hún taldi hana eiga betur við í þetta sinn. Vel er hægt að mæla með þessum rétti í upphafi vikunnar áður en súkkulaði- og sælkerahátíðin hefst með trukki.

Ofnbökuð langa í Balí-sósu

500-600 g langa
1 pk. Balí-sósa frá Toro eða Tikka Masala
1 p kókosrjómi
½ rauð paprika, sneidd
10 tómatar litlir
2 stk. skalotlaukur, niðurskorinn
Mozzarellaostur

Aðferð:

Byrjið á því að hita ofninn í 180°C hita.
Hitið sósuna upp í potti samkvæmt leiðbeiningum. Ingunn notaði kókosrjóma.
Raðið fiskinum jafnt í eldfast mót ásamt paprikunni, tómötunum og lauknum.
Hellið svo Balísósunni yfir.
Stráið síðan mozzarellaostinum jafnt yfir og setjið inn í 180°C heitan ofn í um það bil 20-25 mínútur.
Skreytið síðan réttinn þegar hann er tilbúinn með ferskum sprettum, t.d vatnakarfa frá Lambhaga.
Berið fram með hýðishrísgrjónum og fersku salati eftir smekk.