Matur | mbl | 1.5.2024 | 12:30 | Uppfært 14:29

Ómótstæðilega girnilegur „BBQ“ kjúklingaborgari

Ómótstæðilega girnilegur „BBQ“ kjúklingaborgari. Ljósmynd/Berglind Hreiðars

Nú eru landsmenn komnir í grillgírinn og þá er ávallt gott að fá nýjar girnilegar uppskriftir að grillréttum sem gleðja bragðlaukana. Berglind Hreiðars hjá Gotterí og gersemar er ein af þeim sem er komin í grillgírinn og elskar fátt meira en að færa eldhúsið út á pall og losna við steikingarbræluna. Hún er búin að fá sér steypujárnspönnu sem hún notar á grillið og grillaði á dögunum þennan ómótstæðilega „BBQ“ kjúklingaborgara sem sló heldur betur í gegn hjá hennar fólki.

Ljúft að njóta með krullufrönskum. Ljósmynd/Berglind Hreiðars

„BBQ“ kjúklingaborgara

Fyrir 6

3 kjúklingabringur
6 hamborgarabrauð
50 g brauðrasp
50 g Ritz kex (mulið)
30 g panko rasp
300 ml steikingarolía
1 egg
Hveiti (til að velta upp úr)
Salt, pipar, hvítlauksduft og paprikuduft eftir smekk
Heinz sweet bbq sósa
Majónes
Salat, rauðlaukur, tómatur, paprika
Krullufranskar

Aðferð:

Byrjið á því að kljúfa bringurnar í tvennt svo úr verði tveir þynnri hlutar.
Blandið brauðraspi, Ritz kexi og panko raspi saman og kryddið með um 1 tsk. af salti, hvítlauksdufti og papriku og um ½ tsk. af pipar, blandið vel og setjið í grunnan disk.
Veltið nú kjúklingabringunum upp úr hveiti og dustið umfram magn af, veltið næst upp úr pískuðu egginu og leggið svo í brauðrasp á öllum hliðum þar til þær eru vel hjúpaðar.
Hitið olíuna í djúpri pönnu eða í potti, Berglind hitað olíuna i í djúpri steypujárnspönnu úti á grillinu, setjið franskar í ofninn og gerið grænmeti og sósur tilbúnar á meðan olían hitnar.
Steikið síðan kjúklinginn í 4-5 mínútur á hvorri hlið eða þar til hann er gullinbrúnn og steiktur í gegn, hitið/grillið líka brauðin.
Raðið saman inn í hamborgarabrauð eftir smekk; til að mynda majónes, kál, tómat, rauðlauk, papriku, kjúkling, og toppið með Heinz BBQ sósu.
Berið kjúklingaborgarann fram með krullufrönskum og njótið.