Matur | mbl | 3.5.2024 | 18:00 | Uppfært 18:23

Hollustupítsa með burrata og parmaskinku

Girnilegar og hollar pítsur sem tekur örskamma stund að útbúa. Samsett mynd

Föstudagar eru pítsudagar hjá mörgum fjölskyldum og nú er komið að uppskrift matarvefsins fyrir föstudagspítsuna sem lesendur geta prófað og máta sig við.

Að þessu sinni er það hollustupítsa með parmaskinku og burrata osti og í pítsagerðina að þessu sinni notaði ég lífræna pítsubotna frá Ebbu Guðnýju og Kaju sem eru alveg frábærir. Þeir eru glútenlausir og lífrænir og fullkomið í grípa í þá þegar holla pítsu skal gera á skömmum tíma.

Frétt af mbl.is

Glútenlausir pitsabotnar frá Kaju og Ebbu

Pítsubotnarnir fást meðal annars í Hagkaup og eru seldir frosnir, tveir botnar í hverri pakkningu. Botnarnir eru forbakaðir en það upplagt að forbaka þá aftur ef þið viljið hafa þá stökka.

Burrata-ostur er algjört sælgæti að njóta á pítsu og hægt er að leika sér með meðlætið, eftir því sem ykkur langar til. Það er líka gott að setja heimagert pestó ofan á burrata ostinn á pítsunni.

Burrata osturinn er sælgæti að njóta og þessir pítsabotnar eru snilld. Ljósmynd/Sjöfn

Burrata og parmaskinku pítsa á holla mátann

Fyrir 2

1 pk. Lífrænir pítsubotnar frá Ebbu Guðnýju og Kaju (2 stk.)
1 stór niðursuðudós Mutti pítsaasósa aromatica
1 pk. rifinn mozzarellaostur
2 stk. burrata ostur
1 pk. parmaskinka
1 pk. blandað salat eða klettasalat
Ferskar sprettur ef vill

Aðferð:

Byrjið á því að hita ofninn í 200°C með blæstri og forbakið frosnu botnana í 5 til 10 mínútur.
Takið botnana út og setjið ofan á þá pítsasósu og mozzarellaost eftir smekk, setjið síðan aftur inn ofn og bakið þar til osturinn er bráðinn.
Setjið parmaskinku á botnana eftir smekk, síðan salatið og loks burrata ost á sitt hvorn botninn í miðjuna og opnið burrata ostinn. Upplagt er að strá yfir pítsurnar ferskum sprettum eftir smekk eða ferskri basilíku.
Berið fram og njótið.