Matur | mbl | 28.5.2024 | 14:00

Sturlað góður rauðlaukur á hamborgarann

Sultaður rauðlaukur passar mjög vel ofan á grillaðan sælkeraborgara. Ljósmynd/Hanna Thordarson

Hér er uppskrift að heimagerðum rauðlauk sem er sturlað góður og steinliggur á hamborgarann. Hanna Thordarson keramiker sem heldur úti uppskriftasíðunni Hanna.is er snillingur þegar kemur að þessu nostri í matargerðinni eins og meðlæti sem lyftir réttunum á hærra plan. Næst þegar grilla á hamborgara er upplagt að prófa að vera með sultaðan rauðlauk og piparrótarsósu á hamborgaranum þannig að úr verði sælkeraborgari. Hægt er að gera sultaða rauðlaukinn fyrirfram því hann geymist vel í kæli í lokuð íláti.

Sultaður rauðlaukur er gott meðlæti með mörgu og um að gera að prófa sig áfram. Ljósmynd/Hanna Thordarson

Sultaður rauðlaukur að hætti Hönnu

2 rauðlaukar, afhýddir og skornir í þunnar sneiðar
½ dl balsamik
1 hvítlauksgeiri, pressaður eða saxaður fínt
2 msk. hunang
1 msk. olía
½ – 1 msk. sykur
Nýmalaður pipar

Aðferð:

Setjið niðurskornar lauksneiðar í pott ásamt öðru hráefni og hitið að suðu.
Látið sjóða á meðalhita í 35 – 45 mínútur eða þar til mest af vökvanum hefur gufað upp og blandan er orðin sultukennd.
Munið að hræra í öðru hvoru þannig að blandan brenni ekki við, sérstaklega í lokin.
Setjið í hreina krukku með loki og geymið í kæli.
Berið fram með hamborgaranum eða því sem hugurinn girnist.