Matur | mbl | 31.5.2024 | 21:00

Stella ætlar að smella í Baldursköku í tilefni dagsins

Stefaníu Sigurðardóttur, alla jafna kölluð Stella, finnst vera lykul atriði að vera með pönnukökur í kosningakaffinu á kjördag. Samsett mynd

Stefanía Sigurðardóttir gleðigjafi, alla jafna kölluð Stella, er næsti viðmælandi matarvefsins til að upplýsa dagskrá sína á kjördag sem fram undan er á morgun, laugardaginn 1. júní næstkomandi. Stella elskar að halda veislur og snæða veislumat með fjölskyldu og vinum. Hún er líka mikill kosningafíkill svo hún verður í essinu sínu á morgun og ætlar að mæta prúðbúin á kjörstað og kjósa. „Ég vil hvetja fólk til að kjósa með hjartanu sínu, og gera sér glaðan dag í tilefni þess,“ segir Stella með bros á vör.

Ætlar þú að mæta í kosningakaffi á kjördag?

„Ég verð að þessu sinni með eiginlega mitt eigið kosningakaffi því sonur minn á stórafmæli á kjördag, hann verður fjögra ára. Hann er mikill Baldurs maður og mögulegt að við smellum í Baldursköku í tilefni dagsins. Ég mun a.m.k. baka allt í Baldurssvuntunni minni.“

Hvað finnst þér mest heillandi á kosningakaffihlaðborðið?

„Pönnukökur eru lykilatriði og góðar brauðtertur. Það þarf orku í kjördag og mikilvægt að hafa eitthvað hollt líka eins og ávexti og osta.“

Á mína pítsu fer pepperóní, döðlur og rjómaostur

Ertu búin að ákveða matseðilinn fyrir kvöldverðinn á kjördag?

„Það er ekki ósennilegt að ég smelli í próteinpítsuna sem Helga Magga er mikið með, það er pítsabotn sem er búinn til úr einum bolla af skyri, einum bolla af hveiti og einni teskeið af lyftidufti. Svo ræður heimilisfólkið hvað fer á pítsuna en á mína fer pepperóní, döðlur og rjómaostur.“

Á að mæta í kosningapartí?

„Við munum að öllum líkindum kíkja í gleðina hjá Baldri. Sem kosningafíkill svokallaður þá mun ég líklega vera meira heima límd við sjónvarpið því það lítur allt út fyrir æsispennandi kosningar.“