Matur | mbl | 3.6.2024 | 18:00

Landsliðsþjálfarinn Snædís sæmd Cordon Blue orðunni

Á árshátíð Klúbbs matreiðslumeistara nú nýverið var Snædís Xyza Mae Ocampo matreiðslumeistara veit Cordon Blue orða Klúbbs matreiðslumeistara. Samsett mynd

Á árshátíð Klúbbs matreiðslumeistara nú nýverið var Snædís Xyza Mae Ocampo matreiðslumeistara veit Cordon Blue orða Klúbbs matreiðslumeistara en orðan er veitt þeim sem sýnt hafa fram á framúrskarandi starf í þágu matreiðslufagsins.

Byrjaði að mennta sig í fatahönnun

Snædís fæddist á Filippseyjum 1989 og flutti ung til Íslands, þrátt fyrir að oft hafi á móti blásið, kemur hún alltaf út sem sannur sigurvegari. Snædís ólst upp á Dalvík og flutti síðar til Reykjavíkur til að mennta sig í fatahönnun, en eftir að hafa kynnst matreiðslufaginu í aukavinnu á Sushi Social færði hún sig yfir í matreiðsluna. Hóf námið á Apótekinu, færði sig síðan á Hótel Sögu og útskrifaðist þaðan 2018. Hún starfar núna sem yfirmatreiðslumaður ION Hotel og er þjálfari íslenska kokkalandsliðsins.

Snædís tekur hér við viðurkenningunni hjá Bjarka Ingþóri Hilmarssyni formanni orðunefndar og Þóri Erlingssyni forseta Klúbbs matreiðslumeistara. Ljósmynd/Klúbbur matreiðslumeistara

Hefur tvisvar hlotið brons á Ólympíuleikunum í matreiðslu

Snædís er þaulreynd í keppnismatreiðslu og hóf sín afskipti af íslenska kokkalandsliðinu sem aðstoðarmaður 2015 og tók þátt ásamt liðinu á Ólympíuleikum 2016. Hún var svo fyrirliði liðsins þegar það náði sínum besta árangri og varð í 3. sæti á Ólympíuleikum 2020 samhliða því sem hún gekk með sitt fyrsta barn.

Frétt af mbl.is

Íslenska kokkalandsliðið hreppti 3. sætið á Ólympíuleikunum

„Hún tók við þjálfun liðsins í apríl 2023 og leiddi liðið aftur á pall þar sem það jafnaði árangur sinn frá 2020 og náði 3. sæti. Sem er eftirtektarverður árangur eftir skamma en snarpa 9 mánaða lotu í æfingum, en flest liðin æfðu í 2 ár fyrir mótið,“ segir Þórir Erlingsson forseti Klúbbs matreiðslumeistara. „Snædís er flinkur fagmaður, okkur öllum frábær fyrirmynd, fær stjórnandi og sannur leiðtogi. Fremst á meðal jafningja,“ segir Þórir að lokum og horfir björtum augum til framtíðar fyrir hönd íslenska kokkalandsliðsins.