Gleðigjafarnir nutu guðaveiga og krása

Glæsilegt opnunarteiti var haldið á Konúsalat wine room á dögunum þar sem boðið var upp á guðaveigar og sælkerasmárétti sem runnu ljúft ofan í gesti. Konsúlat wine room er staðsett á Reykjavík Konsúlat hóteli við Hafnarstræti í Reykjavík í hjarta miðborgarinnar.

Gestum var boðið upp á frumlega og ljúffenga smárétti sem búið var að para með sérvöldum vínum og ljúfir tónar spilaðir. Tilefni var að fagna nýju mat- og vínseðli ásamt nýjum áherslum í þjónustu fyrir gesti og gangandi.

Smáréttur fylgir hverri keyptri flösku

„Konsúlat wine room, vínstofan hefur verið opin í nokkur ár en núna höfum við opnað eldhúsið en aðal fókusinn er enn þá á vínin. Við leggjum áherslu á gott úrval glasavína og einblínum á ákveðin lönd eða svæði í einu og pössum að réttirnir passi sérstaklega vel við vínin. Einnig erum við með stóran vínseðil og á „happy hour“ eða hamingjustund fylgir smáréttur með hverri keyptri flösku,“ segir Sólveig Jóhanna Jónsdóttir framreiðslumeistari og veitingastjóri á Reykjavík Konsúlat hóteli og Iceland Parliament hóteli.

Hvernig eru áherslurnar í matargerðinni, matseðlinum sem í boði er?

„Í sumar erum við að vinna með Ítalíu og þau frábæru brögð sem það land býður upp á. Aðaláherslurnar eru þær að þetta eru smáréttir sem einfalt er að deila og til að njóta í afslöppuðu umhverfi. Hægt er að velja mismunandi bruschettur á platta til dæmis með grilluðum ætiþistlahjörtum og gorgonzola osti, grillaðri peru og prosciutto og auðvitað sú klassíska með tómötum, basilíku og burrata osti. Við erum einnig með stökka pólentubita með arrabiata sósu og endívur með sýrðum eplum og gorgonzola svo fátt eitt sé nefnt.“

Maturinn sérstaklega paraður með vínunum

Sólveig segir að mikill metnaður sé lagður í matargerðina og hugað sé að því að para réttina með ákveðnum vínum. „Maturinn er sérstaklega hugsaður til að passa með vínunum. Okkar slagorð eru: „Vínið er aðalrétturinn“ eða „The wine is the reason to dine“. Þannig ákveðum við alltaf fyrst hvaða vín við viljum lyfta upp hverju sinni og matseðillinn er síðan gerður út frá því. Auk þeirra vína sem við erum með fókusinn á að hverju sinni, bjóðum við einnig upp á vín hvaðanæva úr heiminum, bæði í glösum og flösku, auk þessara klassísku drykkja sem finna má á bar.“

Spennandi verkefni að skipta ört um matseðil

Í eldhúsinu stendur vaktina nýr yfirkokkur sem hugsar fyrir hverju smáatriði þegar kemur að matargerð. „Yfirkokkur staðarins er Matthías Ingi , alla jafna kallaður Matti, matreiðslumeistari en hann tók nýlega við Konsúlat Wine Room og hefur lagt veg og vanda við matseðlagerð. Hann hefur einnig verið yfirkokkur á Hjá Jóni, systur veitingastað okkar. Matta þykir gaman að hugmyndinni með Konsúlat Wine Room þar sem sköpunargáfan fær útrás í smáréttunum.  það er spennandi verkefni að skipta ört um matseðil sem talar saman við vínin,“ segir Sólveig með bros á vör.

Einnig verður boðið upp lifandi tónlist reglulega og hugmynd að vera með viðburði þegar tilefni er til. „Við erum með lifandi gítarleik annan hvern föstudag. Hugmyndin er svo að bjóða hópum upp á allskyns viðburði, s.s. vínsmökkun með og án mat og allskyns fræðsluviðburði tengda víni og framleiðslu þess.“

Ítölsk hlýja og sól í hjarta

Sólveig er full tilhlökkunar fyrir sumrinu. „Við erum mjög spennt fyrir sumrinu, ítölsk vín og spritzar í fyrirrúmi hjá okkur. Það er okkar von að matseðillinn ásamt vínunum muni færa okkur smá ítalska hlýju og sól í hjarta, sama hvernig viðrar. Barinn er einstaklega notalegur og mun klárt mál halda vel utan um gestina okkar, jafnvel þó svo að vindurinn muni ferðast hratt í sumar.“

Gleðin var í fyrirrúmi í opnunarteitinu eins og myndirnar lýsa vel.