Matur | mbl | 21.6.2024 | 18:00

Ljúffengt bolognese með burrata osti

Tagliatelle bolognese með burrata osti sem þið eigið eftir að elska. Ljósmynd/Hildur Rut Ingimarsdóttir

Hið klassíska bolognese er ávallt gott og nýtur mikilla vinsælda á mörgum heimilum. Hildur Rut Ingimarsdóttir matarbloggari hjá Trendnet á sína útgáfu að hinu klassíska bolognese sem hún hefur aðeins breytt með frábæri útkomu. Hún ber réttinn fram með burrata osti sem lyftir réttinum upp á hærra plan og ásamt því að vera með tagliatelle í stað þess að vera með spaghettí. Þessi bragðgóði og ljúfi réttur getur ekki klikkað.

Tagliatelle bolognese með burrata

Tagliatelle eftir smekk
1 laukur
2-3 gulrætur
1-2 sellerí
4-5 hvítlauksrif
Ólífuolía
500 g nautahakk
1 krukka Heinz sósa með tómötum og chili
1 msk. tómatpúrra
1-2 msk. fersk steinselja, smátt skorin
Salt og pipar eftir smekk
1 msk. nautakraftur
1/2 dl vatn (eða magn eftir smekk)

Ofan á réttinn

Rifinn parmesan ostur eftir smekk
1-2 burrata ostur
Fersk basilíka eftir smekk

Aðferð:

Byrjið á því að skera lauk, gulrætur og sellerí smátt.
Steikið upp úr vægum hita í pott eða á pönnu.
Bætið krömdum eða pressuðum hvítlauk saman við þegar laukurinn er aðeins búinn að mýkjast.
Bætið nautahakkinu saman við og steikið þar til það er orðið eldað.
Hellið sósunni út í ásamt tómatpúrru, steinselju, salti, pipar, nautakrafti og vatni.
Blandið vel saman og leyfið þessu að malla í dágóða stund. Gott að láta þetta malla í um það bil klukkustund eða lengur. Því lengur því betra.
Sjóðið tagliatelle eftir leiðbeiningum á pakkningu.
Blandið tagliatelle út í nautahakkið eða berið fram í sitthvoru lagi þannig að hver og einn getur skammtað sér.
Toppið svo réttinn með rifnum parmesan osti, burrata og ferskri basilíku.