Matur | mbl | 27.6.2024 | 18:00

Sumarlegur réttur með stracciatella og tómötum

Stracciatella með bökuðum tómötum og basilíkublöðum sem fanga augu fagurkerans og matgæðingsins. Ljósmynd/Hanna Thordarson

Þessir réttur toppar allt, hann er bæði einfaldur og einstaklega góður. Þennan rétt má bera fram sem dögurð, forrétt eða smárétt. Hanna Thordarson keramiker og sælkeri á heiðurinn af þessari uppskrift líkt og af stracciatella-uppskriftinni sem við birtum á dögunum hér á Matarvefnum.

Frétt af mbl.is

Það er ofurauðvelt að gera stracciatella

Gott er að einfalda vinnuna í kringum réttinn með því að forvinna mikið af honum en stracciatella má útbúa daginn áður og tómatarnir þurfa að vera tæpa klukkustund í ofninum þannig að það er upplagt að baka þá fyrr um daginn. Síðan má auðvitað líka vera með heimabakað brauð og undirbúa það með fyrirvara. Ef til eru súrdeigssneiðar í frystinum er upplagt að nota þær, rista á pönnu eða í brauðristinni.

Stracciatella með bökuðum tómötum

500 g litlir tómatar, skornir í tvennt
2 tsk. sykur
2 msk. hvítvínsedik
2 msk. olía
Salt og pipar eftir smekk

Samsetning

Heimagert stracciatella, sjá uppskrift hér
3 stilkar basilíka, blöðin söxuð
2 msk. ólífuolía
Salt og pipar eftir smekk
4 brauðsneiðar að eigin val

Aðferð:

Stillið ofninn á 160°C.
Leggið tómata á ofnplötu klædda bökunarpappír.
Látið afskornu hliðina vísa upp, blandið saman sykri, olíu og ediki saman í skál og dreifið yfir tómatana.
Saltið og piprið eftir smekk.
Bakið tómatana í 50 mínútur eða þar til þeir verða mjúkir.

Samsetning

Setjið stracciatella á fat eða fjóra diska, setjið tómata ofan á, basilíku, olíu og dreifið salti og pipar yfir.
Berið fram með nýbökuðu eða ristuðu brauði að eigin vali.